Kapitenët me shirita kundër racizmit

Kapitenët e skuadrave pjesëmarrëse në Ligën e Kampionëve dhe Europa League në xhiron e ardhshme të përballjeve do të bartin shirita kundër racizmit si pjesë e fushatës kundër diskriminimit, ka njoftuar Federata evropiane e Futbollit, UEFA, të hënën.

UEFA njoftoi se përkrah kampanjën nga FARE, grup i gjerë evropian që për synim ka eliminimin e racizmit nga futbolli, në kërkesën që kapitenët të mbajnë shirita me porosinë “Të bashkuar kundër racizmit”.

Shpeshherë e kritikuar se nuk është duke bërë mjaft për të luftuar racizmin, UEFA ka njoftuar se para ndeshjeve në stadium do të shfaqet një video-mesazh prej 30 sekondash dhe skuadrat do të hyjnë në fushë të shoqëruar nga fëmijët që do të mbajnë të veshura fanella me mbishkrimin e njëjtë kundër racizmit.

“UEFA është e përcaktuar në luftën e saj kundër diskriminimit në futboll dhe ne u bëjmë thirrje tifozëve të futbollit të na bashkohen në përpjekjet tona për respektimin e futbollistëve, zyrtarëve, kundërshtarëve dhe grupeve rivale të tifozëve nga cilido shtet, prejardhje religjioze, orientim seksual dhe origjinë etnike”, deklaroi presidenti i UEFA-s, Michel Platini, në komunikatën e publikuar.