Kardinali Giovanni Battista Re: Françesku ishte një Papë në mesin e popullit

Gjatë ceremonisë mortore të Papa Françeskut, Kardinali Giovanni Battista Re, dekani i Kolegjit të Kardinalëve, përshkroi jetën e Papës së ndjerë si një rrugëtim të përkushtuar ndaj të tjerëve, “deri në ditën e fundit të jetës së tij tokësore”.

“Papa Françesku zgjodhi të ndiqte një rrugë të vetëdhënies deri në ditën e fundit,” tha Re gjatë predikimit të tij përpara mijëra njerëzve të mbledhur në Sheshin e Shën Pjetrit.

Kardinali ndau kujtimet më të fundit të Papa Françeskut, paraqitjen publike të tij në Ditën e Pashkëve, vetëm një ditë para se të ndahej nga jeta.

“Imazhi i fundit që kemi për të, i cili do të mbetet i skalitur në kujtesën tonë, është ai i të dielës së kaluar, kur, megjithë problemet e tij të rënda shëndetësore, donte të na bekonte nga ballkoni i Bazilikës së Shën Pjetrit.”

Ai kujtoi se pas bekimit tradicional, Papa Françesku zbriti në shesh për të përshëndetur turmën duke përdorur makinën e hapur, në një gjest të fundit afërsie me njerëzit që i kishte shërbyer me dashuri për më shumë se një dekadë.

“Me lutjet tona, ne tani ia besojmë shpirtin e Papës sonë të dashur Zotit, që t’i japë atij lumturi të përjetshme në vështrimin e ndritshëm dhe të lavdishëm të dashurisë së Tij të pamasë,” përfundoi predikimin e tij Kardinali Giovanni Battista Re.

/rtsh.al/