Karzai jep paralajmërimin e fundit për NATO-n

Presidenti afgan, Hamid Karzai, ka dhënë paralajmërimin e fundit për amerikanët, pasi trupat e NATO-s vranë 14 civilë, gra dhe fëmijë, gjatë një sulmi në Jug të Afganistanit. Incidente të tilla më viktima civilë janë bërë të shpeshta kohët e fundit në Afganistan dhe urrejtja kundër amerikanëve është shtuar në këtë vend. Karzai i dënoi vrasjet dhe tha se operacionet e pakoordinuara po vrasin civilë të pafajshëm afganë. Presidenti i Afganistanit u ka kërkuar forcave të koalicionit që të minimizojnë sulmet e natës dhe të bashkohen me trupat afgane për të ulur incidentet. Sulmi i natës së të shtunës qëlloi dy shtëpi në provincën Helmand dhe vrau 14 njerëz, të gjithë gra dhe fëmijë. Gjashtë civilë të tjerë janë plagosur.