Mladic apelon vendimin për ekstradim

Familja dhe avokatët e Ratko Mladicit do të apelojnë kundër ekstradimit të ish-komandantit të serbëve të Bosnjës për në Hagë, ku do të përballet me akuzat për krime lufte.

Familja thotë se 69 vjeçari Mladic është shumë i sëmurë që të përballet me një proces gjyqësor, që përfshin edhe akuzat për gjenocid dhe krime kundër njerëzimit.

Avokati i tij madje theksoi se ai madje nuk do të jetojë aq gjatë, sa për të parë fillimin e procesit gjyqësor kundër tij.

Megjithatë, zëvendës-kryeprokurori i Serbisë për krime të luftës, Bruno Vekaric, theksoi se Mladici po shfrytëzon një taktikë zvarritëse dhe se asgjë nuk guxon të pengojë ekstradimin e tij në Hagë.

Të dielën, më shumë se 100 persona janë arrestuar, ndërsa 30 persona janë lënduar në dhunën që shpërtheu në Beograd, gjatë protestës ku bëhej thirrje për lirimin e tij.

Autoritetet serbe kanë arrestuar 180 persona, të cilët sulmuan policinë, deklaroi dje një zëdhënëse e ministrisë së Brendshme në Beograd.

Shumica prej pjesëmarrësve në protestë ishin të ri, me shumë prej tyre që as nuk kanë qenë të lindur, gjatë kohës së luftës në Bosnje.