Kasano show, nga homoseksualët te Baloteli!

Përgatiti: Erion ABULE

Sulmuesi axurr flet për përvojën e tij në Poloni, duke u shprehur rëndë për homoseksualët në futboll dhe në kombëtaren italiane: Janë probleme të tyre. Shpresoj të mos ketë

Ishte një nga realitetet e debutimit ndaj Spanjës, edhe duke parë periudhën e vështirë që kaloi këtë sezon. Por tani, Antonio Kasano po e shijon këtë Europian dhe mendon të qëndrojë sa më gjatë. Nuk e mendoja se do të isha në Europian, e kam thënë shpeshherë, kam qenë me fat, por përveç se po luaj, dua të jem protagonist i kësaj veprimtarie.

Kasanos i shkon mendja te një prej shokëve të tij të pafat, që nuk luajtën në këtë Europian: E vetmja gjë që më vjen keq, është se nuk luan me ne Xhuzepe Rosi, një nga lojtarët vendimtarë. Sulmuesi axurr flet edhe për Balotelin dhe rastin e humbur të golit:

Mendova se do të më pasonte, por aty janë momente, nuk pritej që Serxhio Ramos të ndërhynte. I thashë Marios, duhej të godisje dhe ai më tha, doja të ta pasoja. Unë do tia pasoja, nuk më pëlqen të shënoj. Thuhet se unë duhet të jem tutori i Balotelit.

Po për mua kush do të mendojë? Kam një marrëdhënie të mirë me të, – vazhdon Kasano për shokun e sulmit, – brenda dhe jashtë fushe. Nuk kemi luajtur asnjëherë bashkë, mund të përmirësohemi.

Pas akuzave të Alesandro Çeki Paones (gazetar në televizion), se në kombëtaren italiane ka 3 homoseksualë, Kasanos i rrëshket goja: Probleme të tyre, nëse janë b……, janë probleme të tyre. Nëse e ka thënë Çeki Paone (edhe ky një hokoseksual i deklaruar) që ka të tillë…, – shton Antonio, duke iu përgjigjur fjalëve të Çeki Paones mbi statistikat që flasin për homoseksualitetin në futboll.

Kasano vazhdoi mbi argumentin: Nëse them atë që mendoj, do të ndodhte një rrëmujë. E përsëris, janë probleme të tyre, nuk më takojnë mua. Unë shpresoj që në kombëtare të mos ketë.

Më pas diskutimi kthehet te futbolli, te roli i Di Natales në këtë Europian: Me Di Natalen kam një marrëdhënie të shkëlqyer, unë e quaj snajperi, i jep një gjysmë topi dhe shënon gol. Me polemikën me Kasiljasin, ish-shokun e tij te Real Madridi, pas një faulli në ndeshjen me Spanjën, Kasano shpjegon:

Ankesat e Kasiljasit? Vështirë se bëj faull. Sapo e bëj, ankohen të gjithë. E godita, sepse nuk doja të vrapoja, kam lindur i lodhur. Doja të ndaloja aksionin dhe kaq, ai më tha diçka të tepërt, por mes ish-shokëve të skuadrës ndodh.

Kasano bën polemika kur flet për merkaton e Milanit: Tiago Silva është shitur? Është i pazëvendësueshëm, pa të humbasim 50% të skuadrës. Tani duhet të jemi të qartë se cilat janë objektivat: pa të mund të synojmë Championsin, por ta harrojmë titullin. Klubi do të arsyetojë mbi faktin që do të fitohen shumë para, por duhet të jemi të qartë.