Këshilli Bashkiak i Tiranës, KQZ diskuton për mandatet

Komisioni Qëndror i Zgjedhjeve, ka nisur mbledhjen për konstituimin e Këshillit të ri Bashkiak të Tiranës dhe miratimin e 55 mandateve të reja.Për miratimin e mandateve të këshilltarëve të rinj të Bashkisë së Tiranës që dolën nga zgjedhjet administrative të 8 majit, kërkohet kuorum i cilësuar votash, pra 5 me 2. Kryetari Arben Ristani, në fillim të mbledhjes tha se gara zgjedhore ishte e vështirë dhe kandidatët u ndanë në numër të vogël votash.

Në këtë mbledhje, kanë qënë përfaqësuesit e Partisë Socialiste, të cilët kanë kundërshtuar shpalljen e 55 mandateve, pasi sipas tyre, tabela përmbledhëse ka shifra të vendosura në mënyrë alogjike. Përfaqësuesi ligjor në PS Eridian Saliani deklaroi:
“KQZ u bë pjesë e manipulimit zgjedhor. Sot, vendimmarrja juaj është e fundit. E kryet mirë rolin tuaj në funksion të politikës dhe shkatërrimit të zgjedhjeve”, tha më tej ai.

Ndërsa përfaqësuesi i PD-së, Njazi Kosovrasti pohoi se Bashkia dëshiron Këshillin që meriton dhe se PS-ja, duhet të ankohej për tabelat në Kolegj.

Në zgjedhjet administrative të 8 majit, koalicioni qeveritar “Aleanca për Qytetarin” siguroi mazhorancën e vendeve në Këshillin Bashkiak të Tiranës kundrejt koalicionit opozitar, “Aleanca për të Ardhmen”. “Aleanca për Qytetarin” fitoi 28 këshilltarë, ndërkohë që “Aleanca për të Ardhmen”, 27 këshilltarë.