Komisioni për Politikën e Jashtme zhvillon seancë dëgjimore me dy kandidatë për ambasadorë pranë Misionit të OSBE në Vjenë dhe resident në Shtetet e Bashkuara të Meksikës, Republikën e Panamasë dhe në Republikën Domenikane

Komisioni Parlamentar për Politikën e Jashtme zhvilloi sot një seancë dëgjimore me dy kandidaturat e propozuar për Ambasadorë të Jashtëzakonshëm të Republikës së Shqipërisëë pranë Misonit të OSBE-së dhe Organizatave Ndërkombëtare në Vjenë si dhe në Uashington resident, Shtetet e Bashkuara të Meksikës, Republikën e Panamasë dhe në Republikën Domenikane, jorezident.

Sekretari i Përgjithshëm i Ministrisë së Punëve të Jashtme, Gazmend Turdiu prezantoi dy kandidaturat, z.Gilbert Kalanxhi për në Shtetet e Bashkuara të Meksikës, Republikën e Panamasë dhe në Republikën Domenikane dhe z.Spiro Koçi pranë Misionit të OSBE në Vjenë.

Fillimisht anëtarët e komisionit u njohën me prezantimin e z.Kalanxhi, i cili theksoi rëndësinë e forcimit të marrëdhënieve dy palëshe si dhe nxitjen e takimeve në nivele të larta. Në mënyrë të veçantë, z.Kalanxhi theksoi rëndësinë e forcimit të bashkëpunimit në fushën e sigurisë, politikës dhe ekonomisë.

gjithashtu, z.Kalanxhi tha se një rëndësi të veçantë do të ketë nxitja e liberalizimit të vizave midis vendeve që ai do të përfaqësojë dhe Shqipërisë. Kjo sipas tij do të ishte një nxitje e mirë për shkëmbimet tregëtare, politike por edhe kulturore. Nga ana tjetër, kandidati për ambasador në Shtetet e Bashkuara të Meksikës, Republikën e Panamasë dhe në Republikën Domenikane theksoi se një rëndësi të veçantë do të ketë bashkëpunimi me SHBA për nxitjen e mëtejshme të pavarësisë së Kosovës me vendet që ende nuk e kanë njohur.

Ai tha se një vëmendje të rëndësishme do të ketë edhe forcimi i bashkëpunimit me Fondin Monetar Ndërkombëtar dhe Bankën Botërore me qendër në Uashington si një mënyrë të nxitur investitorët amerikanë të investojnë në Shqipëri.

Në vijim, anëtarët e komisionit u njohën me kandidaturën për ambasador pranë Misionit të OSBE në Vjenë, z.Koçi cilësoi si prioritet të tij gjatë ushtrimit të kësaj detyre rritjen e bashkëpunimit me këtë mision përsa i përket çështjeve rajonale, të sigurisë, marrëdhënieve ndëretnike në rajon, forcimin e institucioneve demokratike etj.

Më shumë nga Zyrtare