Konfiskimi i kateve pa leje, PD ankimon në Gjykatën Kushtetuese vendimin e qeverisë

Konfiskimi i kateve pa leje, duket se po kthehet në një tjetër temë debati mes mazhorancës dhe opozitës. Kjo, pasi PD vendosi sot që të çojë në Gjykatën Kushtetuese vendimin e qeverisë.

Deputeti i Partisë Demokratike, Gazment Bardhi, informoi sot mediat se në Gjykatën Kushtetuese është depozituar një kërkesë nga grupi parlamentar i kësaj force politike, për të shfuqizuar vendimin e qeverisë për katet pa leje.

Nëpërmjet një postimi në rrjetet sociale, Bardhi deklaron se ky vendim i qeverisë ka si qëllim marrjen në mbrojtje shtetërore të oligarkëve, që kanë ndërtuar pa leje “në Kullat e pastrimit të parave të korrupsionit dhe krimit të organizuar në Tiranë”.

“Sot në emër të Grupit Parlamentar të PD depozitova në Gjykatën Kushtetuese kërkesën për shfuqizimin si antikushtetuese të vendimit të Edi Ramës për marrjen në mbrojtje shtetërore të oligarkëve që kanë ndërtuar pa leje në Kullat e pastrimit të parave të korrupsionit dhe krimit të organizuar në Tiranë. Vendimi i Qeverisë për të marrë në mbrojtje oligarkët e ndërtimit të Kullave pa leje në mes të Tiranës:

• Është në kundërshtim me Kushtetutën, sepse cënon barazinë e shtetasve përpara ligjit, cënon hierarkinë e akteve normative dhe nuk është autorizuar nga ligji;

• Është në kundërshtim me Kodin Penal, sepse i jep amnisti penale një kategorie personash, pa ligj të miratuar me 3/5 e votave në Kuvend;

• Është në kundërshtim me ligjin për planifikimin dhe zhvillimin e territorit.

Vendimi i Qeverisë provon që milonerët e Edi Ramës që kanë ndërtuar kulla pa leje në mes të Tiranës, janë të ndryshëm nga 3 milion shqiptarët e tjerë dhe veçanërisht janë të ndryshëm nga 3304 qytetarë që kanë shkuar në burg pse kanë rregulluar pa leje çatinë e shtëpisë së tyre.
Gjykata Kushtetuese ka shansin të na provojë se kushdo është i barabartë përpara ligjit. Oligarkët e Edi Ramës nuk janë mbi ligjin; nuk janë të paprekshëm.”- shkruan Bardhi. /rtsh.al/