Koordinatori Selimi
Ministria e Punëve të Jashtme e Kosovës ka emëruar Zëvendësministrin Petrit Selimi koordinator teknik që do të bëjë koordinimin e të gjitha aktiviteteve që ndërlidhen me aplikimin, anëtarësimin, përfaqësimin dhe pjesëmarrjen e Kosovës në nismat rajonale dhe në mekanizma të BE’së.
Për emërimin e Selimit, Express ka mësuar nga një letër të cilën Ministri i Jashtëm, Enver Hoxhaj, ua ka dërguar ministrave të Qeverisë së Kosovës, ku i ka njoftuar rreth marrëveshjes për anëtarësimin e Kosovës në organizata rajonale.
“Ju informoj që në kuadër të Ministrisë së Punëve të Jashtme të Republikës së Kosovës , z.Petrit Selimi, Zëvendësministër, është përcaktuar si koordinator teknik që do të bëjë koordinimin e të gjitha aktiviteteve që kanë të bëjnë me aplikimin, anëtarësimin, përfaqësimin dhe pjesëmarrjen e Kosovës në këto nisma rajonale”.
Me këtë rast, Ministri i Jashtëm ka kërkuar që të gjitha dikasteret të bashkëpunojnë me Selimin.
“Ju lus që në periudhën në vijim, kur edhe pritet puna intensive në implementimin e marrëveshjes, të gjitha idetë, iniciativat dhe pjesëmarrjet eventuale në takimet e nismave të ndryshme rajonale sektoriale të bëhen në koordinim të plotë me Zëvendësministrin Selimi”, thuhet në letër.
Po ashtu në këto letra bëhet e ditur se MPJ ka formuar një grup punues që synon të anëtarësojë sa më shpejt Kosovën në organizatat rajonale.
Marrëveshja për përfaqësimin e Kosovës në nismat rajonale mes Prishtinë dhe Beogradit ishte arritur gjatë muajit shkurt.
Përfaqësuesit e Kosovës nëpër këto takime tani po përfaqësohen me denominimin “Kosovo “ dhe një asterisk.
Po ashtu marrëveshja përmban edhe fusnotën, ku thuhet se ky formulim është në linjë me Rezolutën 1244 dhe mendimin e GJND’së për deklaratën e pavarësisë së Kosovës.
Sido që të jetë, zbatimi i marrëveshjes po çalon për shkak të interpretimeve që po i bëhen marrëveshjes.
Delegacionet e Serbisë kanë lëshuar takimet ku Kosova është paraqitur vetëm me asterisk, duke kërkuar që aty figurojë edhe përmbajtja e fusnotës.
E pala kosovare ka lëshuar një takim në Beograd ku ka figuruar përmbajtja e fusnotës.
Në Bruksel ndërkaq kanë thënë se marrëveshja është e qartë dhe se u takon organizatorëve të takimeve që të vendosin se ku do ta vendosin fusnotën.