Kosovë-KQZ certifikon rezultatet përfundimtare të zgjedhjeve në tri komuna
Komisioni Qendror i Zgjedhjeve në Kosovë ka certifikuar rezultatet përfundimtare të zgjedhjeve për kryetarë të komunave Prishtinë, Mamushë dhe Junik.
Vendimi u mor menjëherë pasi Paneli Zgjedhor për Ankesa dhe Parashtresa konfirmoi përmbylljen e plotë të procesit të ankesave për këto tri komuna.
Në mbledhjen e sotme u miratua raporti për fazën finale të përgatitjeve për raundin e dytë të zgjedhjeve, që mbahet të dielën më 9 nëntor 2025.
Shpërndarja e materialit zgjedhor ka përfunduar tërësisht: fillimisht u dorëzuan kutitë, kabinat dhe materialet administrative, ndërsa sot, nën përcjelljen e Policisë së Kosovës, arritën në çdo qendër votimi fletëvotimet, listat e votuesve, ngjyra matrikulare dhe vulat zyrtare.
Për ditën e zgjedhjeve, KQZ në bashkëpunim me Prokurorinë e Shtetit dhe Policinë e Kosovës ka hapur dhomën operative për koordinim të plotë dhe reagim të menjëhershëm.
KQZ shpjegon më tej se çdo qytetar, vëzhgues, kandidat apo subjekt politik që vëren parregullsi mund të raportojë direkt në +383 38 200 23 544 ose +383 46 130 013.
Për të mësuar qendrën dhe kodin e vendvotimit tuaj, telefononi falas në 0800 11 000.KQZ fton të gjithë të jenë vigjilentë nesër, vetëm bashkë i sigurojmë zgjedhje të lira, të ndershme dhe transparente.
/rtsh.al/