Kosovë, "Vetëvendosje" mocion votëbesimi ndaj Thaçit

Lëvizja Vetëvendosje, përmes një konference për mediat, ka thënë se do të fillojë të kërkojë nënshkrimin e deputetëve të Kuvendit të Kosovës për një mocion votëbesimi ndaj qeverisë së Kryeministrit Hashim Thaçi.

Kështu ka thënë të dielën Visar Ymeri nga kjo lëvizje, duke thënë se qeveria e Hashim Thaçit po dëmton Kosovën.

Pakënaqësitë e kësaj lëvizjeje vijnë pas marrëveshjes së nënshkruar mes Kosovës dhe Serbisë për menaxhimin e integruar të kufijve. Ai ka thënë se do të takohet me të gjitha partitë opozitare dhe me deputetë veç-e-veç për të kërkuar përkrahjen e këtij mocioni.

“Derisa Angela Merkel ruan shtetësinë e Kosovës duke kërkuar nga Serbia që t`i plotësojë kushtet në raport me Kosovën, Qeveria jonë po heq dorë nga shtetësia duke nënshkruar marrëveshje ku kufijtë e Kosovës cilësohen si pikëkalime”, ka thënë Ymeri.

Gjithashtu, Vetëvendosje nuk i ka përjashtuar protestat që do t`i organizojë deri në rrëzimin e qeverisë së Hashim Thaçit, raporton Zëri.