Kryeministri Berisha: Vendosja e portabilitetit është një ngjarje e rëndësishme për telekomunikacionin, por edhe për zhvillimin e vendit

Kryeministri Berisha  ishte sot  i pranishëm në ceremoninë e fillimit të zbatimit të portabilitetit të numrit të telefonit celularë. Ceremonia u zhvillua në zyrat e Infosoft  në Tiranë, ku morën pjesë Ministri për  Inovacionin  dhe Teknologjinë e Informacionit e të Komunikimit z. Genc Pollo, Kryetari i Bordit të Autoritetit të Komunikimeve Elektronike e Postare (AKEP) Pirro Xhixho dhe Administratori i Infosoft  zoti Grigor Joti.

Portabiliteti  i numrit personal të celularit, do të thotë që një klient i një operatori celular, nëse i pëlqen shërbimi i një operatori tjetër, mund të ndërrojë operatorin duke ruajtur numrin e tij.

Kryeministri Berisha e ka vlerësuar si një ngjarje jashtëzakonisht e rëndësishme  për telekomunikacionin në veçanti, por edhe për tërë zhvillimin e vendit  arritjen e vendosjes së  portabilitetit.

Në përshëndetjen e tij kryeministri tha:

I nderuar zoti Xhixho

I nderuar zoto president i Infosoftit

Përfaqësues të Telekomit e kompanive private

Zonja dhe zotërinj

Është një ngjarje jashtëzakonisht e rëndësishme  për telekomunikacionin në veçanti, por edhe për tërë zhvillimin e vendit  arritja e vendosjes së  portabilitetit . Ky moment shënon shkëputjen përfundimtare të  pronësisë së numrit nga operatori dhe kalimin e tij në pronësi të individit.  Që nga ky moment telekomunikacioni në Shqipëri  fillimisht në fushën celulare dhe më pas në të gjithë spektrin e tij, do të njohë dimensione, të cilat ne që jemi këtu e kemi të vështirë ti parashikojmë.  Do të njohë zhvillime shumë më të mëdha, do të ndezë atë mekanizëm, i cili është faktuar si magjia e të gjitha magjive, konkurrenca, gara. 

Në këtë rast unë dua të përgëzoj ministrin Pollo, dua të përgëzoj zotin Pirro kryetarin e AKEP-it , anëtarët e bordit, punonjësit, por dua të përgëzoj edhe kompaninë Infosoft  dhe partnerin tij. Për përgjegjësinë e madhe me të cilën trajtuan këtë problem dhe i dhanë në kohën më të shkurtër përgjigjen më të mirë. 

Sot, Shqipëria renditet rreth 20 % mbi mesataren Europiane për sa i përket telefonisë celulare, portabiliteti  do të jetë në vetvete një moment i fuqishëm dhe rregullator i tregut, kompanitë celulare kanë dhënë një kontribut të jashtëzakonshëm në zhvillimin e këtij vendi, ato kanë mirënjohjen dhe vlerësimin tonë më të thellë.  Kompanitë e telekomunikacionit u shndërruan në  faktorët më kryesorë të një kapërcimi që Shqipëria bëri, nga nivelet  më të ulta të përdorimit të internetit që ajo kishte në fillim të vitit 2006 në 4.8% në rreth 50 %, që është këtë vit dhe me një rendje të pa përmbajtur mbi mesataren Europiane. Ndaj dhe unë do tu shpreh atyre vlerësimin dhe konsideratën time më të lartë.

Natyrisht dëshiroj dhe uroj që në bashkëpunim me AKEP-in, të gjejmë normat e pranueshme të tregut të tarifave që u caktojnë shërbimin e tyre qytetarëve shqiptarë . Në  mënyrë absolute e pranojmë dhe le të themi këtu publikisht se ato le të jenë edhe më të larta sesa të rajonit, për arsye se Shqipëria ka  një dinamizëm të madh zhvillimi dhe rritje ekonomike, por ato duhet të jene brenda rregullave, sepse të gjitha tregjet e botës disa shërbime i janë lënë tregut, por me një rregullator. Shikoni se çfarë ndodhi me mos respektimin e  rregullatorit me financat, i shndërroi ato në piramida, shndërroi bankat më serioze të botës në piramidat më të shëmtuara të tipit shqiptarë. Kjo është e vërteta jo se nuk kishte rregulla, jo se nuk kishte borde rregullator, por problemi është se bankat nuk iu përgjigjën përcaktimeve te supervizorëve dhe ku përfunduan? Përfunduan në një falimentim të pa parë ndonjëherë në atë  sektor, për shkak të prishjes  së  rregullave.  Nuk është ky rasti, këtu me kompanitë e telekomunikacionit , por kërkoj mirëkuptimin e tyre përcaktimin e rregullave  që përcakton AKEP-i, është një kusht pasi AKEP-i përcakton ato mbi bazën e parimeve të shëndosha, jo shqiptare ndërkombëtare të tregut.

Sot, është rasti të falënderoj këto kompani për kontributin e shkëlqyer,  jashtëzakonisht të rëndësishëm  që kanë dhënë në zhvillimin e këtij vendi, është rasti të falënderoj edhe Infosoftin dhe kompaninë rumune për , veprimin e shpejtë që ndërmorën për ta shndërruar në realitete këtë projekt, i bëj thirrje të gjitha kompanive të Hi Tech-ut shqiptarë le të  guxojnë, sepse koha është para tyre, në kuptimin që tregu po rritet me shpejtësi të madhe  dhe këto duhet të jenë në lartësinë, në nivelet në të cilat ka kapur tregu , po ecin me shpejtësi.  Fakti se ky proces realizohet  nga një kompani shqiptare, e cila është nga më të mëdhatë në Shqipëri është jashtëzakonisht pozitive.

Unë garantoj se qeveria e ka në epiqendër këtë zhvillim, ne nuk kemi  një  sektor ku të kemi përqendruar kaq shumë forca të kualifikuar dhe përpjekje  sa në sektorin telekomunikacionit, e sektorit të moshës  dixhitale dhe efektet janë jashtëzakonisht të jashtëzakonshme.
Por ka një gjë, se komunikimi është bërë sot një e drejtë themelore e njeriu, ju garantoj se në këto zgjedhje mesa po duket do të jenë dhe faktor kryesor i rezultatit.

Ndaj dhe njëherë ju përshëndes dhe ju përgëzoj se keni bërë një punë të shkëlqyer dhe jam jashtëzakonisht i gëzuar që e arritëm këtë.