Kryeministri Berisha i dërgon mesazh ngushëllimi Kryeministrit të Greqisë, z. Kostas Karamanlis

Kryeministri Berisha i dërgoi sot Kryeministrit të Greqisë, z. Kostas Karamanlis, një mesazh ngushëllimi për ndarjen nga jeta të Kryepeshkopit Kristodhulos.

Në mesazhin e tij Kryeministri Berisha shprehet:

“I nderuar z. Karamanlis,

Me hidhërim të thellë mësova lajmin për humbjen e Kryepeshkopit Kristodhulos, i cili për më se një dekadë udhëhoqi me devotshmëri Kishën Ortodokse Greke.

Me personalitetin e tij të shquar dhe udhëheqjen e urtë, Kryepeshkopi Kristodhulos kontribuoi në forcimin e rolit të ortodoksisë në botë dhe e solli Kishën Greke më pranë realitetit modern të ditëve ku ne jetojmë.

Më lejoni, i nderuar z. Kryeministër, që në emër të qeverisë shqiptare dhe në emrin tim personal, t`u shpreh Juve dhe popullit mik grek, ngushëllimet më të thella dhe të sinqerta për këtë humbje të rëndë".