Kryeministri Berisha inauguron përfundimin e punimeve për rindërtimin e sistemit të furnizimit me ujë të pijshëm në qytetet e Beratit dhe Kuçovës

Kryeministri Berisha, ishte sot i pranishëm në ceremoninë e inaugurimit të përfundimit të punimeve për fazën e parë "Furnizimi me Ujë të Pijshëm" për qytetet e Beratit dhe Kuçovës, pjesë e projektit “Furnizimi me ujë i Shqipërisë së Mesme” i bashkëfinancuar nga qeveria gjermane nëpërmjet Bankës Gjermane për Zhvillim (KfW  Entwicklungsbank) me 11.2 milion euro

Në ceremoni  ishin të pranishëm  Ministri Gjerman për Bashkëpunimin Ekonomik dhe Zhvillim, Z. Dirk Neibel,  Ministri i Inovacionit dhe i Teknologjisë së Informacionit dhe Komunikimit Genc Pollo, Zv. Ministri i Punëve Publike dhe Transportit, Z. Ylli Manjani, Ambasadorja e Republikës Federale Gjermane në Shqipëri, Znj. Carola Müller-Holtkemper,  si edhe të tjerë funksionarë të lartë.

Faza e parë e projektit, bashkëfinancohet nga Qeveria Gjermane nëpërmjet Bankës Gjermane për Zhvillim (KfW Entwicklungsbank) me 6.6 milion euro dhe parashikon rehabilitimin dhe zgjerimin e sistemit të furnizimit me ujë të pijshëm, instalimin e matësave të ujit në qytetin e Beratit, si edhe ndërtimin e linjës kryesore të furnizimit me ujë Berat-Kuçovë me një gjatësi prej 12 km. Projekti ka si qëllim t’i sigurojë popullatës, prej 120.000 banorësh, në zonat ku ky projekt shtrihet një furnizim të qëndrueshëm me ujë të pijshëm, i cili përmbush të gjitha kriteret e një uji të pastër higjenikisht.

Gjatë fjalës së tij kryeministri tha:

I nderuar zoti Ministër Niebel.

Zotërinj  anëtarë të Bundestagut.

Zonja ambasadore Carola Müller-Holtkemper .

Zotërinj ministra.

I nderuar zoti kryetar I Bashkisë, qeveritarë vendore dhe drejtues të ndërmarrjes së Ujësjellës Kanalizimeve  Berat-Kuçovë.

Së pari duhet të falenderoj edhe njëherë me shumë mirënjohje qeverinë gjermane, taksapaguesit gjerman, Kancelaren  Merkel, për ndihmën e madhe bujare, që i  kanë dhënë dhe i japin Shqipërisë në përpjekjen e tyre për të shndërruar Shqipërinë në një vend të zhvilluar, në një vend i cili ecën i sigurtë drejt të ardhmes  së saj Europiane.

Zoti ministër, dje ne sëbashku inauguruam një autostradë të një rëndësie të jashtëzakonshme kombëtare dhe ndërkombëtare të energjisë, e cila për nga rëndësia i jep lirisë së tregut dhe tregut energjitike një dimension të ri dhe në fakt ajo ishte vetëm pjesë e projekteve të mëdha që qeveria dhe vendi juaj financon në Shqipëri, në mënyrë që vendi të ketë rrjetin energjitike më të përshtatshëm për bashkëpunim rajonal dhe për të mbështetur rritjen dhe zhvillimin ekonomik të vendit.

Sot ne inaugurojmë këtu fazën e parë të ujësjellësit  Berat-Kuçove, projekt ky i kompletuar dhe i përfunduar me përgjegjësi të lartë dhe parametrat më të mirë nga kompanitë e ndërtimit dhe supervizorët,  financim tërësisht i qeverisë gjermanë.

Ky është një projekt simbolik edhe pse kushton rreth 15 milionë euro, pasi qindra e qindra milionë euro të  tjera janë  investuar në shumë projekte nga veriu ne jug te vendit.  Shfrytëzoj rastin për të falënderuar  KFW  për  punën  e shkëlqyer  dhe  për  angazhimin e tyre që po drejtojnë  një proces, i cili ka për qellim zgjidhjen përfundimtarë  të furnizimit me ujë dhe trajtimit të ujërave në vendin tim. 

I jam mirënjohës  gjithashtu Komisionit Evropian pasi rëne  dakord për  të  zgjedhur KFW  si  kompani drejtuese në këtë  proces.
Ky projekt  për  këtë  rajon është  i një  rëndësie themelore. Ky vend është  një vend  i  përjetshëm.  Historia  thotë  se është  2500 vjeçar,  por nëse  kthehemi pas në kohë, do të gjejmë gjurmë  3000 vjet më të hershme.

Ky vend është shume i veçante  në  trashëgiminë  e vet kulturore. Por një nga gjërat  e shquara të këtij  vendi  është  mënyra  se si qytetaret e  këtij  vendi  ruajtën  jo  vetëm  qytetin e tyre, por edhe librin. Njeri nga librat është  trashëgimi  kulturore  botërore.   Vjen nga shekulli  i 6 dhe nuk u ruajt nëpër  arkiva, por në arkivat e familjes dhe u përçua  gjeneratë  pas  gjenerate, deri ditët e sotme. Dhe ky është  Kodiku i Purpurtë i Beratit, që sot është  trashëgimi  botërore.

E theksova këtë, sepse  dëshiroj  që  taksapaguesit  gjermanë të dinë se ku po investojnë.  Paratë e tyre në këtë rast, po shpenzohen për  njerëz  dhe për  një vend, që ka kontributin e vet  për njerëzimin tone.

Thirrja ime për autoritetet vendore është  kjo:  Mënyra  më  e  mirë për  ti shprehur mirënjohjen taksapagueseve  gjermanë  është  të adoptojmë  disiplinën dhe parametrat gjermane,  në menaxhimin e ujërave dhe kjo  është   pa diskutim  mënyra  më e mire për  ti shprehur  mirënjohjen ndaj tyre.

U gëzova  kur dëgjova  drejtorin e kompanisë, i cili na tregoi se sa ndërhyrje kishin bërë   për  të normalizuar  furnizimin me ujë  për  Kuçovën.  Qytetarëve tanë u mungonte furnizimi me ujë, por tani më shumë se 95 përqind e shqiptarëve furnizohen me ujë të rrjedhshëm.  Sigurisht jo 24 orë, por të paktën  kanë  ujë  të rrjedhshëm.  Por  është  themelore për ne, të angazhohemi  për një menaxhim nga më të mirët.

Edhe një herë ju falenderoj zoti ministër dhe ju shpreh bindjen , se ky kooperim do te vazhdojë.  Ju jemi mirënjohës,  por edhe nevojtarë  për  suportin  tuaj për të ndryshuar sa më shumë  këtë vend.