Kryeministri Berisha merr pjesë në inaugurimin e Qendrës së Telemjekësisë së Shqipërisë

Kryeministri Berisha mori pjesë sot në ceremoninë e hapjes së Qendrës së Telemjekësisë  së Shqipërisë. Në këtë aktivitet ishte i pranishëm dhe Ambasadori i Shteteve të Bashkuara të Amerikës në Tiranë, z. Aleksandër Arvizu, Ministri i Shëndetësisë z. Petrit Vasili, Drejtori i Qendrës Spitalore Nënë Tereza, z. Saimir Ivziku, përfaqësues të USAID, i cili ka mbështetur dhe realizuar këtë projekt, mjekë, etj. 

Rrjeti i Programit të Integruar të Telemjekësisë dhe Shëndetit Elektronik në Shqipëri përbëhet nga Qendra e Telemjekësisë së Shqipërisë në QSUT, në Tiranë dhe prej disa Qendrave Rajonale të Telemjekësisë, në spitalet rajonale të Kukësit, Shkodrës, Durrësit, Korçës, Vlorës,etj., ku një pacient nga secili nga spitalet e lartpërmendura mund të konsultohet  në distancë nga një mjek konsulent në QSUT.  Gjithashtu, Qendra e inauguruar sot ofron mundësinë që pacientët e QSUT-së, në Tiranë, të mund të konsultohen nga mjekë  të spitaleve ose qendrave mjekësore në vende të huaja. Shërbimet e para në QSUT kanë krijuar tashmë partneritete dhe telekonsulta me spitale dhe Institute të njohura  në Evropë dhe SHBA.

Në shenjë simbolike, në inaugurimin e kësaj qendre u realizua lidhja e parë telemjekësore (nëpërmjet  teleprezencës) me profesor Rifat Latifi, Drejtor i Projektit, themelues dhe President i IVeH (International Virtual e-Hospital Foundation), i cili ndodhej me mision në Arizonë.

Kryeministri Berisha dhe të pranishmit e tjerë vizituan gjithashtu edhe Bibliotekën Elektronike, ku mblidhen dhe ruhen materiale mjekësore në formë elektronike, ndryshe nga metoda klasike e deritanishme.

Në fjalën e tij të plotë, Kryeministri Berisha u shpreh:   

“Sot, ne përjetojmë një ngjarje të madhe në tërë historinë e sistemit tonë shëndetësor, sistemit tonë spitalor. Në këtë dhomë të vogël, ideja e parë që të vjen në mendje është e tërë bota në funksion të një të sëmuri dhe kjo është një arritje e jashtëzakonshme për çdo qytetar dhe mjek të këtij vendi, për shoqërinë shqiptare dhe sistemin e saj shëndetësor. Ndaj, me këtë rast, unë dua t’i shpreh mirënjohjen më të thellë qeverisë së Shteteve të Bashkuara të Amerikës, USAID-it, profesor Charles Doarn, profesor Rifat Latifit, të gjithë atyre që bënë të mundur shndërrimin në realitet të një projekti që në mendjen e çdo njeriu është një projekt ëndërr. Një projekt që realizohet në një kohë rekord, që shtrihet në 6 qarqe të vendit dhe që bëhen përgatitjet për t’u shtrirë edhe në 6 të tjera. Ky projekt lidh sot, Korçën me John Hopkins, një nga kryeqendrat botërore të mjekësisë, do të lidhë Kukësin nesër me Baltimoren dhe do të bëjë që të sëmurët të mund të kenë mendimin më të kualifikuar të kohës.

Por ky është vetëm njëri aspekt. Aspekti tjetër është ndikimi i jashtëzakonshëm që telemjekësia do të ketë në formimin e vazhdueshëm profesional të mjekëve tanë, sepse nuk ka energji më të fuqishme, sesa gara dhe secili nga mjekët, në komunikimin e diskutimin me kolegun e tij, do të jetë ndaj vetes shumë herë më kërkues. Sistemi nuk të vë vetëm para një sfide, por me librarinë elektronike të krijon mundësi të pakufizuara, të jashtëzakonshme për kualifikimin e përditshëm e më të madh.

Unë dua t’i shpreh një mirënjohje të veçantë USAID-it, institucion i qeverisë amerikane, i cili gjatë këtyre 19 viteve ka realizuar qindra projekte në të gjitha fushat dhe i ka shndërruar ato në histori të vërteta suksesi. Ambasadori Arvizu përmendi disa nga projektet e aplikuara në shëndetësi nga viti ‘92 deri më sot, unë do të ndalem vetëm në disa projekte të zbatuara nga USAID-i, nga viti 2007 gjer më sot. Projekte, të cilat kanë ndryshuar në mënyrë thelbësore e cilësore këtë vend. I tillë është projekti i prokurimeve elektronike, projekti që bëri që Shqipëria të meritojë çmimin e transparencës së Organizatës së Kombeve të Bashkuara, i tillë është projekti i taksës elektronike, projekti ‘one stop shop’ që e renditet sot Shqipërinë në 10 vendet më të para në botë për regjistrimin e biznesit, i tillë është sot ky projekt i telemjekësisë që hap një kapitull të ri në diagnozën, në formimin dhe komunikimin në tërë sistemin tonë shëndetësor.

Qeveria, duke shprehu mirënjohjen më të thellë ndaj jush profesor Latifi që me aq vendosmëri e përkushtim e keni ndjekur zbatimin e këtij projekti dhe të gjithë pjesëmarrëseve të tjerë, dua t’ju garantoj se do të bëjmë gjithçka për ta vendosur sistemin tonë shëndetësor, në tërësi e në çdo gjë, në bazat më moderne dixhitale. E-health, shëndetësia dixhitale është një nga projektet më madhore të dy viteve që vijnë. Projekt, i cili synon së pari, të përmirësojë ndjeshëm e të vendosë mbi baza të reja menaxhimi në tërësi të sistemit shëndetësor. Historia e suksesit është e lidhur më shumë se me çdo gjë tjetër me historinë e menaxhimit. Ndaj ne i kushtojmë një rëndësi kaq të madhe.

Edhe një herë ju falënderoj shumë për këtë dhuratë të shkëlqyer që i keni bërë shqiptarëve, pjesës më në nevojë të tyre, të sëmurëve. Dua të falënderoj edhe ushtrinë amerikane, një ushtri e shkëlqyer, që, krahas mbështetjes që i ka dhënë dhe i jep ushtrisë shqiptare, në mënyrë konstante gjatë këtyre viteve është angazhuar me përkushtim edhe në projekte në sistemin shëndetësor e projekte të tjera.