Kryeministri Berisha priti Kryetarin e Bashkisë së Selanikut z. Yiannis Boutaris

Kryeministri Berisha priti sot në një takim Kryetarin e Bashkisë së Selanikut  z. Yiannis Boutaris, i cili shoqërohej dhe nga Ambasadori i Greqisë në Tiranë z. Nicolas Pazios.

Pasi i uroi përzemërsisht mirëseardhjen Kryeministri  Berisha e falenderoi  Kryebashkiakun  Boutaris,  për mikpritjen dhe  mbështetjen që  qyteti i Selanikut,  iu ka dhënë mbi  70 mijë shqiptarëve dhe familjeve të tyre, të cilën jetojnë dhe punojnë sot atje.

Kryebashkiaku  Boutaris  e falenderoi  përzemërsisht  Kryeministrin Berisha, për pritjen  e ngrohtë e miqësore dhe i rikonfirmoi atij dëshirën e Bashkisë së Selanikut, por edhe të qytetarëve të saj, për të intensifikuar bashkëpunimin dhe marrëdhëniet e shkëmbimet ekonomike, kulturore, artistike  etj,  në dobi të forcimit të miqësisë dhe interesit më të mirë të qytetarëve të Selanikut dhe atyre të Shqipërisë.

Në këtë kontekst Kryetari i Bashkisë Boutaris informoi kryeministrin se gjatë kësaj vizite  do të  zhvillojë  takime me  Kryetarin e Bashkisë së Tiranës, për të evidentuar të gjitha fushat ku mund të zhvillohet një bashkëpunim intensiv midis Tiranës dhe Selanikut,  si edhe do të nënshkruajë marrëveshjen e binjakëzimit me qytetin e Durrësit, e cila parashikon një sërë aspektesh ku pritet të ndërtohet një bashkëpunim frytdhënës midis këtyre dy qyteteve porte të rëndësishëm të Rajonit.

Në takim u rikonfirmua vullneti për të nxitur intensifikimin e investimeve dhe shkëmbimeve ekonomike të ndërsjella, si një faktor themelor për rritjen ekonomike dhe mirëqenien e qytetarëve.

Kryebashkiaku  Boutaris shfrytëzoi këtë rast, për ti shprehur  Kryeministri Berisha dëshirën e tij dhe të qytetarëve të Selanikut, për ta mikpritur Kryeministrin Berisha në Selanik, si mik i madh, i shquar dhe promovues  i marrëdhënieve shumë të mira dhe bashkëpunimi të gjithanshëm  i miqësisë midis të dy vendeve e popujve fqinj.