Kryeministri Berisha zhvillon homazhe në nderim të deputetit Gëzim Dibra

Kryeministri Berisha, i shoqëruar nga bashkëshortja zonja Liri Berisha, zhvilloi dje pasdite, homazhe në nderim të deputetit të Kuvendit të Shqipërisë Gëzim Dibra, i cili u nda nga jeta dy ditë më parë. Pas homazheve, që u zhvilluan në mjediset e bashkisë së Shkodrës, Kryeministri Berisha shprehu edhe një herë dhimbjen për ndarjen nga jeta të deputetit Dibra dhe njëherësh, i përcolli ngushëllimet familjes dhe qytetarëve të Shkodrës për këtë humbje. Në mesazhin e tij, Kryeministri Berisha u shpreh:
 
“Erdha këtu për të shprehur nderimin më të thellë, respektin më të madh për deputetin Gëzim Dibra, një njeri i mrekullueshëm, i cili me një aktivitet jo të gjatë në politikë, por la tek unë dhe të gjithë ata që patën fatin ta njohin përshtypjet, së pari, të një njeriu të mrekullueshëm, të një burri fisnik, të një njeriu të përkushtuar.
 
Erdha gjithashtu, të ndaj zinë me familjen e tij, miqtë dhe qytetin e Shkodrës. Ata kanë humbur një prind shembullor, një familjar shembullor, Shkodra një qytetar ndër më dinjitozët e fisnikët e saj, një politikan të ndershëm, të përkushtuar, një zë të fuqishëm në parlamentin shqiptar. Partia Demokratike ka humbur një veprimtar të saj shumë të çmuar, por bota e biznesit, gjithashtu, ka humbur një simbol të suksesit të vërtetë. Na mbetet që edhe një herë të urojmë që familja e tij, bashkëshortja, vajza, nëna, njërëzit e tij të gjejnë forcën për të përballuar këtë humbje të rëndë, të pakompensueshme dhe t’i lutemi Zotit, të gjithë sëbashku, që shpirti i mikut tonë, i njeriut të mrekullueshëm siç ishte Gëzim Dibra, të gjejë paqen e merituar.
 
Edhe një herë i shpreh ngushëllimet e mia më të sinqerta, të qeverisë dhe Partisë Demokratike, familjes, të afërmëve, Shkodrës dhe qytetarëve të saj për këtë humbje të madhe”.