Kryeministri i Japonisë zotohet të qëndrojë në detyrë pavarësisht humbjes së thellë në zgjedhje

Koalicioni qeverisës i kryeministrit japonez Shigeru Ishiba pësoi një humbje të thellë në zgjedhjet për Dhomën e Lartë të parlamentit, duke humbur shumicën e nevojshme për të ruajtur kontrollin legjislativ. Partia Liberale Demokratike (LDP) dhe aleati i saj, Komeito, siguruan vetëm 47 vende, tre më pak se minimumi i kërkuar prej 50 vendesh për të mbajtur shumicën krahas 75 vendeve ekzistuese.

Rezultati shënon një tërheqje prej 19 vendesh krahasuar me përbërjen e mëparshme dhe e bën koalicionin e Ishibës pakicë në të dy dhomat e parlamentit,  një zhvillim i paprecedentë që nga themelimi i LDP-së në vitin 1955.

Humbja e Dhomës së Lartë pason një tjetër humbje në zgjedhjet e Dhomës së Ulët në tetor, duke e dobësuar ndjeshëm pozitën e kryeministrit Ishiba. Megjithatë, ai shprehu vendosmërinë për të qëndruar në detyrë, duke përmendur nevojën për stabilitet politik në një kohë kur Japonia po përballet me sfida serioze, si rritja e çmimeve dhe presionet tregtare nga Shtetet e Bashkuara.

/rtsh.al/