Kryeziu dëshiron të riciklojë Muharremin për kryetar të Prizrenit

Ish-kryetari i Prizrenit, Eqrem Kryeziu nuk dëshiron që të riciklohet për kryetar të këtij qyteti. Ai disa herë është shprehur kundër riciklimeve të njerëzve. “Nuk më pëlqen riciklimi i njerëzve”, ka thënë Kryeziu. Përkundër këtij qëndrimi, Kryeziu nuk ka kundërshtuar riciklimin e kandidatit tjetër të LDK-së, Hanifi Muharremit. Ai, madje po i jep përkrahje Muharremit që të kandidojë për kryetar të Prizrenit. Burimet e “PrizrenPress-it”, bëjën të ditur se Kryeziu dëshiron që edhe në zgjedhjet e këtij viti, LDK-së të garojë për kryetar të Prizrenit me Muharremin. “Hanifia përkrahjen më të madhe për të garuar për kryetar të Prizrenit e ka nga Kryeziu”.

LDK-ja në Prizren në Kryesinë e LDK-së në Prishtinë, ka dërguar dy emra për kryetar të Prizrenit, atë të Eqrem Kryeziut dhe Hanifi Muharremit, ndërkaq Dega e LDK-së në Zhur, e ka dërguar emrin e Nijazi Ademajt. Këto dy degë të LDK-së, në mungesë të gjetjes së një kandidati të përbashkët, veç e veç, i kanë dërguar propozimet e tyre në Prishtinë për kryetar të Prizrenit.

Hanifi Muharremi e ka konfimuar për “PrizrenPress” se LDK-ja në Prizren, ka propozuar emrin e tij dhe të Eqrem Kryeziut për kandidat për kryetar të Prizrenit. ” Po është e vërtet që unë dhe Eqremi jami propozuar që të kandidojmë për kryetar të Prizrenit, në zgjedhjet e këtij viti. Emrat janë dërguar në Kryesi të LDK-së në Prishtinë dhe Këshilli i Përgjithshëm do të vendosë se cili nga ne dy do të jetë kandidat për kryetar të Prizrenit”, tha Muharremi.

Në zgjedhjet e vitit 2009, Muharremi ka qenë kandidat i LDK-së për kryetar të Prizrenit. Ai ka humbur garën përballë kryetarit aktual të Prizrenit, Ramadan Muja. Burimet brenda LDK-së tregojnë se Eqrem Kryeziu nuk ka kundërshtuar propozimin e Muharremit për kryetar të Prizrenit. “ Jo vetëm që nuk e ka kundërshtuar,por edhe e ka mbështetur propozimin e Muharremit. Kur je kundër riciklimit atëherë është dashur t’i thuhet jo edhe riciklimit të Muharremit dhe të kërkohet një kandidat tjetër”.

Mënyra e propozimeve të kandidatëve për kryetar të Prizrenit, deri më tash është kundërshtuar edhe nga disa anëtarë të LDK-së. Sipas tyre, nëse LDK-ja hynë në zgjedhje me këto probleme, atëherë vështirë do të ketë që të fitojë Prizrenin. /Indeksonline/