Kule:52 studentë të juridikut do të penalizohen për mashtrim

Universiteti i Tiranës do të çojë për ndjekje penale 52 emra të rinjsh të akuzuar për mashtrim në institucionet e arsimit të lartë. Rektori i këtij universiteti Dhori Kule denoncon gjestin manipulues të këtyre studentëve të rregjistruar në fakultetin e juridikut sivjet për të ndjekur studimet në sistemin Part-Time, por njëkohësisht është zbuluar se ata rezultojnë të rregjistruar në një tjetër fakultet. Kjo sipas rektorit përbën shkelje të ligjit të arsimit të lartë. Rektori i Universitetit të Tiranës, e konsideron këtë rast të studentëve të juridikut në sistemin Part-Time të pashembullt, ndaj në bashkëpunimin me krerët e fakultetit, po përgatisin procedurat për ndjekje penale. Universiteti i Tiranës është bashkërenduar edhe me universitetet e tjera publike të vendit, për të hetuar nëse ka të tjerë të rinj që kanë kryer këtë mashtrim. Pa asnjë dallim, sipas Kules të gjithë do të ndiqen penalisht.