Kultivonte bimë narkotike, policia kap 16-vjeçarin dhe asgjëson 80 fidanë

Policia ka arrestuar një 16-vjeçar për kultivim të bimëve narkotike.

Si rezultat i kontrolleve, policia ka evidentuar në fshatin Koplik i Sipërm 80 fidanë të dyshuar narkotikë kanabisi, të kultivuar në kubikë, duke i asgjësuar më pas ato.

Pas gjetjes së bimëve është identifikuar një 16-vjeçar i cili është kapur dhe më pas është  proceduar në gjendje të lirë për shkak të moshës.

“Në vijim të goditjeve të njëpasnjëshme që në gjenezë, të tentativave për kultivim të bimëve narkotike, si rezultat i kontrollit të imtësishëm të territorit, nga toka dhe ajri, me dron, bazuar dhe në inteligjencën informative, shërbimet e Policisë kanë konstatuar në lagjen Gjuraj, në fshatin Koplik i Sipërm, në një zonë të pyllëzuar, 80 fidanë kanabisi të kultivuar në kubikë, të cilët u asgjësuan me anë të djegies dhe një pjesë e tyre u sekuestrua në cilësinë e provës material”, thuhet në njoftimin e policisë.

Ndërkaq, materialet procedurale i kaluan Prokurorisë pranë Gjykatës së Rrethit Gjyqësor Shkodër, për veprime të mëtejshme.

/rtsh.al/