Kuvendi miraton ndryshimet në Qeveri

Miratohet me 72 vota "pro" emërimi i Flamur Nokës ministër i Brendshëm dhe Edmond Panariti ministër i Punëve të Jashtme

Kuvendi shprehu sot votëbesimin për ndryshimet në qeverinë “Berisha”. Sipas propozimeve të kryeministrit Berisha, të dekretuara nga presidenti i republikës Bamir Topi, u realizuan me 71 votat e deputetëve të mazhorancës në këtë seancë plenare shkarkimet e ministrave dhe emërimet e reja në ekzekutiv.
Votimi i parë ishte shkarkimi zyrtarisht nga detyra e ministrit të Brendshëm e presidentit të zgjedhur me 11 qershor Bujar Nishani, i cili po përgatit kabinetin për t’u betuar si kryetar shteti më 24 korrik, ditë kur zyrtarisht nis mandatin e tij 5 vjeçar.
Në postin e rëndësishëm të ministrit të Brendshëm u emërua demokrati tjetër Flamur Noka, aktualisht deputet dhe sekretar organizativ i PD-së.
Nga radhët e LSI-së, Kuvendi votoi daljen nga qeveria të ministrit të Shëndëtësisë Petrit Vasili, i cili zëvendësohet me ish-nënkryetarin e Kuvendit Vangjel Tavo. U shkarkua gjithashtu ministri i Ekonomisë Nasip Naço, i cili i la vendin Edmond Haxhinastos, teksa ky i fundit zevendësohet me Edmond Panaritin
Për Nasip Naçon nuk është e re detyra që mori pas largimit nga qeveria.
Ndërsa Kuvendi ka hyrë në muajin e fundit të punës së këtij sesioni, ka përmbyllur zgjedhjen e presidentit të republikës dhe ndryshimet në qeveri, por sfidat për të nuk kanë përfunduar, një pjesë e të cilave e kanë të domosdoshme votën e opozitës.
Mazhoranca dhe opozita miratuan më herët me konsesus kalendarin trejavor të punimeve në konferencën e kryetarëve të grupeve parlamentare, por pritet për t’u parë se sa ky konsesus do të përkthehet në reforma dhe përmbushje të plotë të kalendarit të sapomiratuar.