Kuvendi sot në seancën e radhës, diskutohen ndryshimet në buxhet
TIRANË- Kuvendi do të mblidhet sot në seancën e radhës në të cilën do të diskutohen ndryshimet në buxhetin e shtetit. Ndryshime, të cilat vetëm pak ditë më parë u miratuan në Komisionin e Ekonomisë.
Seanca do të jetë pa praninë e opozitës, e cila ka njoftuar edhe një ditë më parë se do të vijojë bojkotin deri në plotësimin e kushteve të kërkuara për transparencën e zgjedhjeve.
Ndërkaq, demokratët e kanë përsëritur po dje ftesën e tyre për PS-në, këtë radhë përmes kreut të grupit të tyre parlamentar, Astrit Patozit, i cili e ka quajtur shuam të rëndësishme praninë e socialistëve në sallën e Kuvendit, e në mënyrë të veçantë në këtë senacë ku diskutohet buxheti. Sipas tij, ata duhet të paraqesin objeksionet e tyre për ndryshimet e kaluara në komision.
Komisioni miraton rialokimin e buxhetit, Bode pranon krizën
TIRANË - Qeveria ka pranuar efektet që ka dhënë kriza ekonomike në buxhetin e shtetit. Ministri i Financave, Ridvan Bode ka dërguar në Komisionin e Ekonomisë projektligjin për rialokimin e buxhetit të 2009-ës.
Ai ka sqaruar se janë afro 10 miliard lekë që do të rivlerësohen, ku 8 miliard lekë i përkasin investimeve publike, tenderat e të cilave nuk janë realizuar në kohë, ndaj anulohen. "Po kështu janë edhe 1.3 miliard lekë të tjetra të cilat i kemi kursyer nga shpenzimet operative", tha Bode në komision.
Ministri foli edhe për arsyet që çuan në devijimin e fondeve. "Rishikimi i buxhetit bëhet si pasojë e mos mbledhjes së taksave dhe tatimeve në nivelin e programuar në fillim të vitit", u shpreh ai. Sipas tij, doganat dhe pushteti lokal janë dy institucionet që kanë pasur probleme në mbledhjen e taksave.
Risku kryesor i ekonomisë mbetet kursi i këmbimit. "Huan më të madhe e kemi në valutë ndaj dhe ndryshimi i kursit të këmbimit na ka sjellë një rivlerësim edhe të borxhit të jashtëm", u shpreh Bode. Ai kërkoi që ekspertët të bëjnë analizat dhe të mos dalin në konkluzione paraprake, pasi sipas tij kjo luhatja e kursit mund të jetë e përkohshme.
Ministri kërkoi që në buxhetin e vitit që vjen pushteti lokal të rishikojë shpenzimet operative me tendencë ulje dhe të përqendrohet në realizimin në kohë të investimeve publike.
Kjo ishte mbledhja e parë e Komisionit Parlamentar të Ekonomisë, që u zhvillua pa deputetët e opozitës. Komisioni miratoi me votat e mazhorancës ndryshimet në buxhet.