LDK: Dita e Flamurit i gjen shqiptarët më të unifikuar

Kjo ditë e bekuar e historisë sonë kombëtare është dhe do të mbetet përgjithmonë pika më e shndritshme e referencës së idealeve të shqiptarizmit, të atyre idealeve të cilat u mbrojtën me flijime të mëdha që në kohën e Motit të Madh të Gjergj Kastriotit, u ringjallën fuqishëm në kohën e Rilindjes dhe kulmuan më 28 nëntor 1912, me aktin historik të ngritjes së Flamurit në Vlorë, thuhet në urimin e kryetarit të Lidhjes Demokratike të Kosovës (LDK), Isa Mustafa, me rastin e 28 Nëntorit, Ditës së Flamurit.

Nesër shqiptarët kremtojnë 28 Nëntorin-Ditën e Flamurit Kombëtar, datë kjo që përkon me shpalljen e pavarësisë së Shqipërisë, 99 vjet më parë nga Ismail Qemajli në Vlorë.

Mustafa ka thënë se sot, Dita e Flamurit i gjen shqiptarët më të unifikuar se kurrë në udhën drejt integrimit të plotë në familjen e madhe euroatlantike.

“Kështu, jetësimi i kësaj ëndrre sublime të shumë brezave shqiptarë, tashmë ka nisur të marrë formë; kombi ynë po rikthehet në vendin e vet të natyrshëm, në djepin e kulturës europerëndimore. Prandaj, ritheksojmë se 28 Nëntori i flamurit kombëtar do të mbetet përgjithmonë një ditë e shënuar e historisë sonë dhe e përpjekjeve shekullore të kombit tonë për liri, pavarësi dhe paqe në këtë pjesë të Evropës Juglindore dhe kudo në botë”, thuhet në urim.