Lamtumirë ‘Shtetit të Palestinez’? Ministri ekstremist izraelit Smotrich, miraton 3,400 vendbanime në Bregun Perëndimor
Ministri izraelit i Financave, Bezalel Smotrich, një figurë e njohur e ekstremit të djathtë, ka shkaktuar reagime të forta pas njoftimit se ka miratuar një plan për ndërtimin e 3,401 njësive të reja banimi për kolonët në rajonin E1 të Bregut Perëndimor. Smotrich e bëri të qartë se ky veprim do t’i japë “goditjen fatale idesë së një shteti palestinez”.
Lajmi, i cili u raportua nga disa media izraelite si Jerusalem Post, Times of Israel dhe Ynet, thekson një zhvillim të rëndësishëm dhe potencialisht shpërthyes në rajon. Plani i vendbanimeve do të ndërtohet në zonën E1, ose “korridorin”, një zonë strategjike me sipërfaqe 12 kilometra katrorë, ngjitur me Jerusalemin Lindor. Kjo zonë është shtëpi e shumë komuniteteve beduine, por tani do të jetë qendër e ndërtimeve të reja izraelite.
Organizata Paqe Tani ka qenë kritike ndaj këtij plani. Siç raporton Jerusalem Post, organizata e ka cilësuar planin e Smotrich si një “goditje vdekjeprurëse ndaj zgjidhjes me dy shtete.”
Arsyeja është se ky korridor do të ndante efektivisht Bregun Perëndimor në dysh, duke bërë të pamundur zhvillimin e një zone metropolitane midis Ramallahut, Jerusalemit Lindor dhe Betlehemit. Kjo ndarje gjeografike do të pengonte thellësisht formimin e një shteti të pavarur dhe funksional palestinez.
Smotrich njoftoi gjithashtu se do të mbajë një konferencë për shtyp bashkë me Presidentin e Këshillit Yesha, Israel Ganz, dhe Kryetarin e Bashkisë së Ma’aleh Adumim, Guy Yifrach, për të dhënë më shumë detaje mbi këtë vendim.
Megjithatë, ka pasur edhe disa nuanca në raportime. Siç thekson Ynet, ndërkohë që njoftimi i Smotrich është bërë publik, nuk ka pasur ende një konfirmim zyrtar mbi miratimin e planit. Publikimi izraelit vuri në dukje se projekte të mëparshme të tilla, edhe pse janë publikuar gjerësisht, janë vonuar për vite me radhë, duke lënë të kuptohet se ky proces mund të mos jetë i menjëhershëm.
Ky zhvillim vjen në një kohë tensionesh të larta dhe thekson qartësisht pozicionin e fortë të krahut të djathtë izraelit kundrejt çdo ideje për krijimin e një shteti palestinez.
/rtsh.al/