Lavrov: Plani i paqes për Ukrainën të pasqyrojë frymën e takimit Putin-Trump
Ministri i Jashtëm rus Sergei Lavrov tha se plani paqes për Ukrainën duhet të pasqyrojë “frymën dhe shkronjën” e mirëkuptimit të arritur midis presidentit Vladimir Putin dhe p;residentit të SHBA-së Donald Trump në samitin e tyre në Alaskë.
Duke folur në një konferencë për mediat në Moskë, Lavrov tha se Rusia ka mirëpritur një version fillestar të planit të paqes së SHBA-së për Ukrainën – të cilin Kievi dhe aleatët e tij e konsideruan shumë të favorshëm për Moskën, por po priste një version të ndryshuar “të përkohshëm” pasi Uashingtoni të kishte përfunduar koordinimin me Ukrainën dhe Evropën.
Lavrov tha se Rusia përfaqësuesit e së cilës u raportua se po përgatiteshin të zhvillonin më shumë bisedime me SHBA-në në Abu Dhabi më vonë të martën – ka një pikëpamje shumë të ndryshme për iniciativën.
“Vlerësimet tona mbeten të vlefshme në kuptimin që dispozitat kryesore të planit (origjinal) të Trump bazohen në mirëkuptimet e arritura në Anchorage në samitin ruso-amerikan në gusht të këtij viti. Dhe këto parime pasqyrohen përgjithësisht në plan, të cilin ne e mirëpritëm”, tha Lavrov.
Plani fillestar përjashton përgjithmonë anëtarësimin e Ukrainës në NATO, kishte kufizuar ushtrinë e saj në 600 mijë ushtarë, kishte propozuar dorëzimin e pjesës tjetër të Donbasit Rusisë – megjithëse si një zonë e çmilitarizuar – dhe kishte mandatuar që Kievi të mbante zgjedhje brenda 100 ditëve.
Të gjitha këto klauzola raportohet se janë ndryshuar ose janë lënë mënjanë për momentin.
Lavrov tha se Moska nuk po nxiton me Uashingtonin, por shpreson se do ta ndajë tekstin e fundit të përkohshëm me Rusinë kur të jetë gati.
/rtsh.al/