Lideri testohet në Merdarë

Liderin e Superligës e pret një udhëtim i vështirë në Merdarë, ku do të përballet me kampionin në fuqi, Hysin. Këta të fundit do të mundohen t’i prishin punë Prishtinës, për të cilën vetëm fitorja është e rëndësishme në garë për titull.

Java 30-të e Raiffeisen Superligës së Kosovës në futboll do të sjellë përballje mjaft interesante, pasi në Merdarë takohen kampioni Hysi dhe lideri i tabelës Prishtina.

Skuadra kryeqytetase në tri ndeshjet e fundit ka shënuar nga pesë gola, por kundër Hysit do të jetë shumë e vështirë, pasi skuadra llapjane në shtëpi është skuadër shumë e fortë.

Pavarësisht kësaj, mesfushori i Prishtinës, Qëndrim Sejdiu është shprehur optimist për këtë duel dhe ka thënë se vetëm fitorja është e rëndësishme, nëse dëshirojnë të ruajnë hapin për titull.

“Ne në Merdarë shkojmë për fitore, pasi vetëm fitorja është e rëndësishme në këtë fazë të kampionatit”, tha mesfushori bardhekaltër për Express.

Në anën tjetër, Yll Hoxha ka pranuar se tashmë i kanë humbur gjasat për titull, por se kundër Prishtinës do të luajnë lojën e tyre dhe do të shpresojnë në një rezultat pozitiv.

“Ne, edhe pse i kemi humbur gjasat për titull, kundër Prishtinës do të luajmë lojën tonë dhe do të shpresojmë për një rezultat pozitiv”, tha mesfushori i Hysit.

Po në këtë xhiro do të ketë edhe dy ndeshje shumë të rëndësishme në luftën për mbijetesë, pasi do të takohen Gjilani – Trepça dhe KEK-u - Lepenci.

Superliga – Xhiroja e 30-të

E shtunë

Hysi – Prishtina 15:15

KEK-u – Lepenci 16:00

Gjilani – Trepça 16:00

E diel

Drita – Vëllaznimi 15:15

Besa – Liria 16:00

Trepça ’89 – Drenica 16:00