Lila, së shpejti nënë

Edhe pse nuk është parë shumë viteve të fundit në skenë me këngë në gjuhën shqipe, por vetëm në gjuhën italiane dhe atë franceze, Elsa Lila ka lëvizur më shumë sa i përket jetës së saj private.

Në një intervistë të botuar në “Gazeta Shqiptare”, Elsa rrëfen ndjesinë që po përjeton në shtatzëni dhe të rejat që e presin pas lindjes së bebes së saj, Evita.

Elsa rrëfen se karriera e saj do të vazhdojë, ndërsa kujton prezantimin e festivalit të RTSH që, siç tregon ajo, nuk i ka lënë shije aq të mirë.

“Ishte dhjetori i vitit 2008 dhe sapo kisha mbaruar prezantimin e festivalit të këngës në Shqipëri. Isha shumë e lodhur dhe e stresuar (më shumë nga prapaskenat e pakëndshme që pata gjatë punës, sesa nga puna në vetvete)”.

Këngëtarja shpreson së lindja e vajzës do të gjallërojë dhe jetën e saj artistike. Besoj se kur të shoh sytë dhe buzëqeshjen e saj, poezitë e tingujt do të lindin vetvetiu. Bota dhe realiteti i vështirë që na rrethon përditë duke na ngurtësuar fantazinë dhe ndjenjën, do të marrin dritë të re, ngjyra të reja.

Elsa shprehet se dhe Evita e vogël, sapo të forcohet pak, do të ndjekë prindërit e saj drejt Madagaskarit, në Afrikë. “Kur Evita të bëhet tre-katërmuajshe, do të udhëtojmë së bashku drejt ishullit magjik ku nisi gjithçka”.