“Maldivet e Europës”, “The Sun” artikull për Ksamilin: Plazhe me rërë të bardhë dhe ujë kristal të pastër

“Maldivet e Europës” kështu e ka konsideruar tabloidi britanik “The Sun” Ksamilin, teksa përshkruan në një artikull eksperiencën e një vizitoreje britanike. Në artikull përshkruhen plazhet me rërë të bardhë dhe ujërat kristal, ndërsa po ashtu edhe mënyra sesi qytetarët britanikë mund të mbërrijnë fare thjeshtë në Ksamil.

Artikulli është shpërndarë edhe nga kryeministri Edi Rama, i cili shkruan se “një tjetër yll” i shtohet Shqipërisë nga mediat ndërkombëtare.

“Një tjetër yll i shtohet Shqipërisë nga mediat ndërkombëtare që e quajnë ‘Maldivet e Europës’ dhe është i mirënjohuri “The Sun” i cili përshkruan ujërat e bruzta dhe tonet e portokallta të perëndimit në Ksamil, por edhe komoditetin e standardet e larta të shërbimeve që vizitorët britanikë i vlerësojnë në Shqipëri”, shkruan Rama.

Artikulli i plotë i “The Sun”:

Një nënë ka treguar se si ka vizituar “Maldivet e Evropës” dhe pse ra në dashuri me këtë vend.

Për shumë njerëz, plazhet me rërë të bardhë dhe ujërat blu të pastër i bëjnë Maldivet një destinacion të preferuar. Por vajtja atje nuk është gjithmonë aq e lehtë. Fluturimet janë të gjata dhe të shtrenjta, që do të thotë se njerëzit përfundojnë duke kërkuar alternativa më afër.

Megjithatë, blogerja e Tik Tok-ut e njohur si “Travel Mum”, ka zbuluar se sa e lehtë është të arrish diku me pamje të ngjashme, pa pasur nevojë të largohesh nga Evropa.

Në një video, ajo shpjegoi se si mund të shkoni në Ksamil të Shqipërisë, që i quajti “Maldivet e Evropës” dhe shpjegoi saktësisht se çfarë mund të presin vizitorët.

Pamjet e saj janë parë më shumë se një milion herë në Tiktok, ku ajo dhe familja e saj shihen duke shijuar plazhet me rërë me ujëra kristal, si dhe perëndimin e diellit në ngjyrë portokalli të thellë nga ballkoni i hotelit. Për më tepër, plazhi ishte shumë i qetë, që do të thotë se pushimet e saj dukeshin të qeta dhe relaksuese.

Njerëzit u mahnitën nga ajo që panë në video dhe thanë se do të konsideronin ta vizitonin vetë Ksamilin.

Njëri shkroi: “Uau diku ku nuk kisha menduar kurrë të shkoja.”

Një tjetër thjesht shtoi: “Duket e mahnitshme”. Megjithatë, një i tretë ishte i shqetësuar se sa e vështirë do të ishte të arrije atje, duke pyetur: “Si do të arrimë atje? A është e komplikuar?”

Në një video të veçantë , blogerja shpjegoi se si arriti atje shumë lehtë.

Ajo tha: “Ne vazhdojmë të dëgjojmë për Maldivet e Evropës, kështu që le ta kontrollojmë. Ka disa gjëra që duhet të bëjmë për të arritur atje, e para është të marrim një fluturim për në Korfuz . Tani që jemi në Korfuz po i drejtohemi portit dhe po marrim një traget për në Sarandë në Shqipëri”.

Përveç vendpushimit dhe sa e thjeshtë ishte për të arritur atje, ajo ishte gjithashtu e kënaqur me kostot e lira të akomodimit.

“Ne kemi rezervuar një apartament qendror me dy dhoma gjumi për vetëm 190 £ për gjashtë netë. Është një bazë e shkëlqyer për të shijuar plazhet e shumta të bukura, por edhe për të eksploruar disa vende të mrekullueshme afër. Sapo kemi shpenzuar 5 paund në supermarket për të ushqyer pesë persona. Ne jemi absolutisht të dashuruar me Shqipërinë”, tha ajo.

Për ata që nuk janë të interesuar të marrin një traget nga Korfuzi, ka një mënyrë edhe më të lehtë për të arritur në Ksamil nga Mbretëria e Bashkuar.

Linjat direkte lidhin Shqipërinë me Londrën, Mançesterin, Birminghamin, Bristolin dhe Neëcastl. Dhe ky vend i panjohur pushimesh është vetëm tre orë nga Mbretëria e Bashkuar.