Marina amerikane shkarkon komandantët në bordin e nëndetëses së përplasur
Marina amerikane ka shkarkuar tre anëtarë të ekuipazhit në bordin e një nëndetëse bërthamore që u përplas në një mal nënujor, njofton BBC.
Komandanti Cameron Aljilani dhe dy të tjerë u hoqën pas një hetimi për incidentin e diskutueshëm në Detin e Kinës Jugore.
USS Connecticut goditi objektin muajin e kaluar, duke e detyruar anijen të dilte në sipërfaqe për një javë dhe të lundronte në territorin amerikan të Guam.
Zyrtarët e marinës thonë se anëtarët e ekuipazhit “mund ta kishin parandaluar” përplasjen.
Javën e kaluar, marina tha se nëndetësja kishte goditur një “mal të detit” të paeksploruar ndërsa patrullonte nën sipërfaqe.
Pesëmbëdhjetë marinarë pësuan lëndime të lehta. Nëndetësja aktualisht po kontrollohet për dëmtime në Guam në Paqësor përpara se të kthehet në Uashington për riparime.
Incidenti ndodhi mes tensioneve në rritje në rajon.
USS Connecticut operonte në një nga rajonet më të kontestuara në botë. Kina pretendon pjesën më të madhe të Detit të Kinës Jugore, por vendet përreth dhe SHBA nuk pajtohen.
Incidenti ndodhi vetëm disa javë pasi SHBA, Britania e Madhe dhe Australia ranë dakord për një pakt historik sigurie për të ndarë teknologjinë e nëndetëseve në Azi-Paqësor, i parë gjerësisht si një përpjekje për të kundërshtuar fuqinë e Kinës.
Përplasja zemëroi zyrtarët në Pekin, të cilët kanë vënë në dyshim se çfarë po bënte anija në rajon dhe thanë se ishin të shqetësuar për rrjedhje të mundshme bërthamore.
Në një konferencë shtypi të premten, një zëdhënës i ministrisë së jashtme kineze tha se SHBA-ja duhet të japë një llogari të plotë të incidentit dhe të “ndalojë provokimin e saj”, njoftoi agjencia e lajmeve Reuters.
Zyrtarët e marinës amerikane ende nuk kanë shpjeguar se si anija goditi malin detar.
Ryan Ramsey, një ish kapiten i nëndetëseve të Marinës Mbretërore Britanike, tha se ishte i tronditur nga përplasja, e cila është relativisht e rrallë.
“USS Connecticut është një nëndetëse shumë moderne – kështu që është befasuese”, tha ai për BBC.