Mike Pence: Nuk kam qenë në dijeni të ndonjë përpjekjeje të Trump për të deklasifikuar dokumentet
Ish-zëvendëspresidenti, Mike Pence, tha të dielën se nuk ishte në dijeni të ndonjë “përpjekjeje të gjerë” nga Donald Trump, për të deklasifikuar dokumentet përpara se të largohej nga Shtëpia e Bardhë.
“Ka një proces nëpër të cilin kalon Shtëpia e Bardhë për të deklasifikuar materialet. Jam i vetëdijshëm që kjo ka ndodhur në disa raste gjatë katër viteve tona. Por unë nuk kam njohuri për ndonjë direktivë me bazë të gjerë nga presidenti,”- tha Pence për ABC Neës të dielën.
“Por kjo nuk do të thotë se nuk ka ndodhur. Unë thjesht po them se nuk është diçka për të cilën kam dëgjuar,”- shtoi ai.
Trump u padit për shtatë akuza në qershor si pjesë e hetimit të Departamentit të Drejtësisë për trajtimin e dokumenteve të klasifikuara nga ish-presidenti që u sollën në resortin e tij në Mar-a-Lago Florida, pasi ai u largua nga Shtëpia e Bardhë në vitin 2021, si dhe pengim të mundshëm të hetimit në përpjekjet e qeverisë për të tërhequr materialet.
Të dhënat e klasifikuara supozohet të ruhen në vende të sigurta. Dhe, sipas Aktit të Regjistrimeve Presidenciale, të dhënat e Shtëpisë së Bardhë supozohet të shkojnë në Arkivin Kombëtar kur të përfundojë kona e një administrate. Trump ka mohuar në mënyrë të përsëritur çdo keqbërje.
Që nga shpallja e ofertës së tij për në Shtëpinë e Bardhë në fillim të këtij viti, Pence e ka kritikuar Trumpin për rolin e tij në sulmin e 6 janarit 2021 në Kapitolin e SHBA-së, por ai ka qenë i kujdesshëm për të mos i shtrirë kritikat e tij përtej kësaj.
Pence nuk e ka përjashtuar mundësinë e faljes së ish-presidentit. Ai i tha CNN në fund të muajit të kaluar se ndërsa veprimet e Trump më 6 janar ishin të pamatur, ai nuk është ende i bindur se ato ishin kriminale.
I pyetur se cila do të jetë strategjia e tij në skenën e debatit të mërkurën, Pence tha të dielën: “Unë thjesht do të jem unë”.
“Ndjehem sikur jam përgatitur për këtë debat të parë presidencial republikan gjatë gjithë jetës sime.” CNN
/rtsh.al/