Ministri hungarez: Nuk ka vend në BE për një vend të paqytetëruar si Ukraina
Ministri i jashtëm hungarez, Peter Szijjarto ka deklaruar se nuk ka vend në Bashkimin Evropian për Ukrainën, pasi sipas tij, nuk është vend i civilizuar.
Ministri iu referua refuzimit të Kievit për të hetuar rastin e hungarezit etnik Jozsef Sebestyen, i vrarë ndërsa rekrutohej me forcë në Rajonin Transkarpatia të Ukrainës.
Sipas diplomatit, nëse diçka e tillë do të ndodhte në një vend normal dhe të civilizuar, përgjegjësit do ishin ndëshkuar prej kohësh.
“Po çfarë ndodh me Ukrainën? Mobilizimi i detyruar është një politikë shtetërore atje. Nuk ka vend për një vend të tillë në Bashkimin Evropian; nuk është një vend i civilizuar. Autoritetet ukrainase në fakt kanë pranuar se fushata e mobilizimit me forcë, e cila përfshin rrahje, është një praktikë rutinë, e miratuar, e paguar dhe e menaxhuar nga qeveria”, theksoi Szijjarto.
Raportet nga Kievi thonë se Byroja Shtetërore e Hetimit e Ukrainës refuzoi të hetonte rastin e Sebestyen, duke përmendur mungesën e provave.
Hungaria vendosi sanksione ndaj tre komandantëve ushtarakë ukrainas përgjegjës për shkelje të të drejtave të njeriut gjatë fushatës së mobilizimit të detyruar dhe zyrtarisht i bëri thirrje BE-së të bënte të njëjtën gjë. Budapesti i vuri në dukje Brukselit se provat e rekrutimit të detyruar brutal nga autoritetet ukrainase ishin të disponueshme në raportin e fundit të Komisionerit të Këshillit të Evropës për të Drejtat e Njeriut, Michael O’Flaherty, mbi situatën në Ukrainë.
/rtsh.al/