Ministri i Jashtëm i Ukrainës: BE të vendosë sanksione të forta ndaj Rusisë, të godasë buxhetin e Putinit

Pas takimit me përfaqësuesen e Lartë të Bashkimit Evropian për Punët e Jashtme dhe Politikën e Sigurisë, Kaja Kallas, ministri i Jashtëm i Ukrainës, Andrii Sybiha ka deklaruar se Ukraina pret sanksione të fuqishme kundër Rusisë që do të godasin buxhetin e luftës së udhëheqësit rus Vladimir Putin.

“Diskutuam hapat e ardhshëm që BE-ja të rrisë presionin e sanksioneve ndaj Rusisë. Presim që ato të jenë vërtet të forta dhe të dëmtojnë buxhetin e luftës së Putinit”, tha Sybiha.

Ai vuri në dukje gjithashtu se kishte diskutuar me Kallas rëndësinë e ecjes përpara me procesin e pranimit të Ukrainës në Bashkimin Evropian.

“Theksova se Ukraina i përmbushi të gjitha kërkesat për të hapur grupin e parë të negociatave dhe se pengimi i procesit nga një vend është i papranueshëm”, u shpreh ai.

Hungaria dhe Sllovakia refuzuan të miratojnë paketën e 18-të të re të sanksioneve të Bashkimit Evropian kundër Rusisë deri në takimin e Këshillit Evropian, ku udhëheqësit e BE-së pritet të diskutojnë presionin e mëtejshëm të sanksioneve ndaj Kremlinit.

Kallas tha se Bashkimi Evropian planifikon të miratojë paketën e 18-të të sanksioneve kundër Rusisë deri në fund të kësaj jave (23-29 qershor).

/rtsh.al/