Miss Politika
Një fotografi e bërë së bashku në mes të Miss Kosovës dhe Miss Serbisë nuk ka zgjuar vetëm reagim nëpër mediat serbe, të cilat kanë cilësuar se Miss Serbia me atë foto e ka njohur pavarësinë e Kosovës, por edhe të medieve botërore.
Gazeta të njohura italiane dhe spanjolle, por edhe ato të Amerikës Latine, kanë shkruar për foton e përbashkët të dy miss-eve, e cila thuhet se u bë skandal, pasi që të dy miss-et e botuan atë në profilet e tyre në Facebook.
Gazeta e njohur spanjolle “El Mondo” shkruan se dy miss-et, Dreshaj dhe Saranovic janë dy nga 87 konkurrentët e Miss Universe, që pritet të mbahet në Sao Paolo në Brazil, më 12 shtator.
“Pa menduar dy herë, miss-et ishin dalë në një fotografi së bashku. Por, ato nuk kishin ditur se sa kokëçarje do të mund t’u shkaktonte fotoja . Kjo edhe u bë sepse fotografia e profilit është shpërndarë nëpër media të Kosovës dhe Serbisë. Serbët e interpretuan si tradhtare të kombit missin e tyre”, shkruan El Mondo.
Gazeta shkruan për atë se si serbët e kishin quajtur tradhtare missin e tyre, për shkak se ata ende e konsiderojnë Kosovën si pjesë të tyre. Por, Saranovic më sa duket e kishte bërë këtë foto vetëm sa për sy e faqe, sepse pas reagimeve ajo mbështeti politikën serbe për Kosovën.
“I mbështes politikat e vendit tim”, ka shpjeguar ajo për gazetën. “Ajo fotografi nuk do të thotë se unë e njoh shtetin e Kosovës, sepse Kosova është pjesë e Serbisë”, ka thënë Saranovic.
Ndryshe mendon kosovarja Dreshaj. Ajo është përgjigjur në profilin e saj në Facebook duke thënë: “Kam dëgjuar për skandalin që ka shkaktuar fotoja ime me Miss Serbinë. Është çmenduri. Mos lejoni që politika të përzihet në jetën tuaj”, ka shkruar ajo për fansat e saj në Facebook.
Për këtë ka shkruar edhe media amerikane ABC, që ka raportuar të njëjtën gjë për fotografinë e të dyja miss-eve. Megjithatë, disa media shkruajnë se miss-et nuk janë aq të afërta me njëra-tjetrën, edhe pse kanë pozuar disa herë bashkë. ABC sjell edhe një thënie të Dreshajt, që e ka postuar në ueb faqe se “vendi i saj ka vuajtur shumë gjatë këtyre viteve nga serbët, të cilët kanë vrarë shqiptarë”.
Për skandalin ka shkruar edhe gazeta e njohur italiane Corriere della Sera, që ka sjellë edhe deklaratën e Miss Serbia, së Kosova është pjesë e Serbisë. Gazeta e ka transmetuar edhe deklaratën e Dreshajt në Facebook.
Miss Kosova, Afërdita Dreshaj po merr pjesë në spektaklin “Miss Universe 2011”, duke e përfaqësuar Kosovën për herë të katërt në këtë eveniment, përderisa fotografi të Miss Kosovës dhe Miss Serbisë ishin bërë edhe më parë në Miss Universe, por kjo e fundit ka ngjallur reagimin edhe të medieve të huaja, të cilat kanë shkruar se Ballkani di të përziejë politikën edhe kur është fjala te bukuroshet.