Moti i keq rikthen problematikën e banesave gjysmë të shembura në Gjirokastër

Moti i keq i këtyre ditëve, ka rikthyer problematikën e shtëpive të gurta gjysmë të shembura në qytetin e Gjirokastrës. Me gjithë restaurimin e disave prej tyre, shqetësimi tek banorët mbetet i njëjtë pasi muret e tyre, kanë marrë çarje dhe janë dëmtuar duke rrezikuar ata që kalojnë apo jetojnë pranë. Në gjendje të tillë është banesa e braktisur e Lolomanëve, në lagjen Varosh të Gjirokastrës.  

Disa banesa karakteristike në Gjirokastër në këto ditë dimri, po dëmtohen dukshëm për shkak edhe të rreshjeve të shumta. Përgjegjesi i trashëgimisë kulturore në Drejtorinë Rajonale të Kulturës Kombëtare Vaso Polo, shprehet se banesat e dëmtuara gjatë dimrit janë nën vëzhgim për të shmangur çdo lloj problematike. Ai pohon se këtyre shtëpive po u kushtohet vëmendje për mirëmbajtie dhe restaurim.  

Në Gjirokastër janë rreth 15 banesa monument-kulture të dëmtuara. Mes tyre edhe dy shtëpitë e Lolomanëve, ajo e Hadërajve, e Çanojve, etj.