Mungesa e jodit, një rrezik i padukshëm për shëndetin

Ndërkohë që dieta moderne është më e varfër në jod për shkak të ndryshimeve në stilin e ushqyerjes dhe përpunimit të ushqimeve, ekspertët po paralajmërojnë për një rikthim të mungesës së jodit sidomos tek gratë shtatzëna dhe fëmijët.

Jodi është thelbësor për funksionimin e gjëndrës tiroide dhe prodhimin e hormoneve që rregullojnë metabolizmin, energjinë dhe zhvillimin e trurit te fetusi. Mungesa e tij mund të çojë në strumë, hipotiroidizëm, lodhje, shtim në peshë dhe probleme të tjera si infertiliteti apo konfuzioni mendor.

Burimet më të mira të jodit janë ushqimet e detit, algat, peshku dhe kripa e jodizuar. Personat që ndjekin dieta pa peshk apo produkte qumështi janë më të rrezikuarit.

Mjekët rekomandojnë konsum ditor prej 150 mikrogramësh për të rriturit, ndërsa gratë shtatzëna dhe ato që ushqejnë me gji kanë nevojë për rreth 250 mikrogramë në ditë, shpesh në formën e suplementeve.

Një kontroll i thjeshtë mjekësor dhe analiza për funksionin e tiroides mund të ndihmojnë në diagnostikimin dhe trajtimin e hershëm të mungesës së jodit një element i vogël, por jetik për shëndetin tuaj.

Kujdes! Ky është një artikull informues dhe nuk zëvendëson këshillën e mjekut.

/rtsh.al/