Mustafa: Do t’i përjetësojmë veprat e Rugovës

Në 68 vjetorin e lindjes dhe njëqind vjetorin e shtetit shqiptar , u bë zbulimi i shtatores së presidentit historik Ibrahim Rugova, në shkollën e cila mban emrin e tij në Obiliq, aty dhe ku vite më parë , ai kishte qenë mësimdhënës.

Kryetari i Lidhjes Demokratike të Kosovës, Isa Mustafa, kryetari i Komunës së Obiliqit Mehmet Krasniqi dhe përfaqësuesi i familjes Rugova, bënë zbulimin e bustit të ish presidentit Rugova, i cili në këtë manifestim, u cilësua si figura më e madhe e kombit, vizionar dhe prijës politik.

Kryetari i Komunës së Obiliqit, Mehmet Krasniqi deklaroi se festen e madhe të 100 vjetorit të pavarësisë së Shqipërisë, po e përmbyllin me zbulimin e bustit të Ibrahim Rugovës në Obiliqi.

Ai tha se Ibrahim Rugova si ideolog dhe udhëheqës i lëvizjes së Kosovës, për pavarësi dhe shtet ndërtim, rikthehet sot në vendin nga ku kishte filluar rrugëtimin e tij të gjatë për Kosovën, duke u përjetësuar përgjithmonë në qytetin e Obiliqit.

“Ne Obiliqasit, jemi me fat që sot po përjetësojmë Rugovën në Obiliqin tonë, që ai aq shumë e deshi dhe për të cilin kontribuoj aq shumë në arsimimin e tij. Ne do të donim që Rugova dhe vepra e tij kolosale të gjente vend anë e kënd vendit, e përjetësuar në vepra të natyrave të ndryshme. Është kjo gjëja më e vogël, tepër e vogël, që ne i kemi borxh presidentit tonë, si bashkudhëtare në një rrugëtim të shenjtë ”, ka thënë ai.

Edhe kryetari i Lidhjes Demokratike të Kosovës, Isa Mustafa ka thënë se zbulimi i këtij busti është një gjest i mrekullueshëm, pasi që Rugova e meriton një nderim të tillë.

“Unë mendoj se është një gjest i mrekullueshëm, që ju keni bërë sot. Është një gjest që i ka takuar kësaj shkolle, kësaj komune, i ka takuar këtij kolektivi të shkollës dhe na ka takuar të gjithë neve. Sepse presidenti Rugova , meriton që ne ta nderojmë dhe meriton që figurën e tij ta kemi çdo ditë ku jemi, për arsye se nderimi i figurës së presidentit Rugova, është nderim që ne i bëjmë vetvetes dhe Kosovës ”, tha ai.

Mustafa, po ashtu theksoi se LDK do të vazhdojë rrugën dhe filozofinë e presidentit Rugova, duke pohuar se do të angazhohen në përjetësimit e dy veprave që la ai, himnin dhe flamurin.

“Ai na la dy vepra të rëndësishme, la flamurin e Dardanisë, të cilin ne do ta respektojmë, dhe si LDK do të angazhohemi që në të ardhmen të jetë flamuri i republikës së Kosovës. Dhe la himnin, të cilin e kënduan më parë nxënësit, kur ka ra kushtrimi në Kosovë, të cilin himn do të angazhohemi, që në të ardhmen të jetë himn i republikës së Kosovës”, tha Mustafa.

Ai po ashtu tha se në fillim të vitit të ardhshëm, në sheshin e pavarësisë “ Ibrahim Rugova”, do të zbulohet shtatorja e presidentit Rugova, vepër kjo monumentale, para se cilës do të përkulemi çdo ditë dhe çdo orë.

Kurse, akademik Mark Krasniqi, e quajti Rugovën njeri vizionar, i cili ka bërë një punë të madhe për pavarësinë e Kosovës.

Ai foli dhe për bashkimin kombëtar, pa të cilin siç tha ai nuk do të zgjidhen problemet.

“Pa pasur shtet kombëtar, nuk zgjidhet problemi shqiptar, i cili është problemi më i madh në Evropë. Por këtë po ia lëmë politikanëve tanë të rinj, të cilët kanë energji dhe vizion që ata ta ndjekin këtë rrugë, dhe se kjo ka qenë rruga dhe e Ibrahim Rugovës”, tha ai.

Në këtë ceremoni, u shfaq dhe një film dokumentar, mbi jetën, veprën dhe kontributin që ka dhënë presidenti Rugova për shtet ndërtimin e Kosovës.

Po ashtu nxënësit e shkollës “ Ibrahim Rugova ”, në Obiliq, në një program artistik, kënduan këngë kushtuar ish presidentit Ibrahim Rugova, si dhe recituan një poezi të tij. /kosovapress/