NATO vret njeriun numër dy të Al Qaidës në Afganistan

Një nga figurat më të vjetra të Al Qaedës në Afganistan ka mbetur i vrarë në një sulm ajror të forcave të NATO-s, të kryer gjatë fundjavës së kaluar.

Lajmin e ka bërë të ditur vetë Aleanca përmes një komunikate për shtyp, në të cilën Sakhar al Taif, me origjinë saudite, përshkruhet si njeriu numër dy i Al Qaidës në Afganistan.

Ai ka qenë përgjegjës për drejtimin e kryengritësve të huaj dhe për sulme kundër trupave të koalicionit dhe vetë atyre afgane.

Ndërkohë, burime talebane nga provinca e Kunarit mohojnë vrasjen dhe deklarojnë se lideri terrorist ishte larguar nga zona e sulmit tre muaj më parë.

Megjithatë, në komunikatën e NATO-s thuhet se: “Sakhar al Taifi vdiq në një sulm ajror me saktësi të lartë në rajonin e Uatahpurit, në provincën e Kunarit”.

Sipas njoftimit për shtyp, një tjetër anëtar i rëndësishëm i Al Qaedës ka mbetur i vrarë në të njëjtin sulm.

Al Taifi, i njohur ndryshe me emrat Mustaq dhe Nasim, organizonte trafikun e armëve dhe transportin e kryengritësve në Afganistan. Ai ka pasur lidhje të ngushta me luftëtarët talebanë të zonës.

NATO vlerëson se në Afganistan veprojnë më pak se 100 pjesëtarë të Al Qaedës.