Ndahet nga jeta aktorja e “Black Panther”, Connie Chiume

Connie Chiume, aktorja veterane e Afrikës së Jugut , e cila luajti në filmin e Marvel 2018 “Black Panther”, është ndarë nga jeta në moshën 72-vjeçare.

Ka qenë familja e aktores ajo që konfirmoi lajmin e hidhur, ndërsa bën me dije se Chiume mbylli sytë përgjithmonë në një spital të Johanesburgut.

Në një njoftim të shkurtër në Instagram të martën, ata thanë se: “Familja Chiume me keqardhje ju informon për ndarjen nga jeta të aktores Connie Chiume, fituese e çmimit Ndërkombëtar.

“Connie Chiume 72, ndërroi jetë në Garden City Hospital sot më 6 gusht 2024. Familja kërkon privatësi gjatë kësaj periudhe të vështirë. Familja do të komunikojë detaje të mëtejshme.”

Chiume ka lindur në Afrikën e Jugut në vitin 1952. Para se të fillonte një karrierë në showbiz që zgjati më shumë se 45 vjet, ajo u trajnua si infermiere dhe punoi si mësuese.

Përpjekja e saj e parë në botën e argëtimit erdhi në vitin 1977 kur ajo iu bashkua një shfaqje muzikore të quajtur “Sola Sola”, e cila bëri turne në Izrael dhe Greqi. Ajo vazhdoi të grumbullonte një mori titujsh si në skenë ashtu edhe në ekran, duke përfshirë dramën e njohur televizive të Afrikës së Jugut “Gomora”.

/rtsh.al/