Nën kujdesin e Kryetares së Kuvendit çelet ekspozita Harmoni besimi, me punime të piktorit të mirënjohur, Gjovalin Paci.

       Harmoni besimi është ekspozita më e re dhe e veçantë e çelur me punime të artit pamor,  të piktorit të njohur Gjovalin Paci,  nën kujdesin e Kryetares së Kuvendit Jozefina Topalli. Ekspozita paraqiti rreth 100 punime me teknikë të ndryshme artistike, në mjediset e Universitetit Europian, Tiranë.   Tema e ekspozitës, harmonia fetare është shumë e veçantë.  Ajo i përket shpirtërisht kombit shqiptar si një model i jashtëzakonshëm dhe si vlerë shumë e çmueshme e trashëguar në shekuj dhe kombi shqiptar  mund t'ia përcjellë këtë model edhe vendeve të tjera.- u shpreh Kryetarja e Kuvendit.   Harmonia fetare është shprehje e një civilizimi  të thellë të një qytetërëmi të madh të kombit tonë, dhe piktori Gjovalin Paci e ka shprehur këtë, me vepra shumë të veçanta.    Piktori Gjovalin Paci shprehu falenderim dhe vlerësim për mbështetjen që Kryetarja e Kuvendit i dha çeljes së kësaj ekspozite.   Ekspozita Harmoni besimi ka pëcjellë  kompozime me teknikë të lartë të punimit të akrelikut në telajo, në rrjetë, pastel e karbon.   Në formë rrethore vjen koncepti Harmoni besimi ku simbolet reale dhe abstrakte, shprehin marëdhëniet mes besimeve si harmoni shoqërore.     Rektori i Universitetit Ardian Civici tha se ekspozita Harmoni besimi shpreh një temë shumë të ndjeshme për shoqërinë tonë, si një vlerë e rrallë civilizimit.
Ai  vlerësoi veçanërisht mbështetjen që Kryetarja e Kuvendit, i jep zhanreve të  artit dhe kulturës, me tema të tilla.   Nga ana e saj Kryetarja e Kuvendit shprehu kënaqësinë që një ekspozitë e një piktori të madh, mbahet në mjediset universitare, ku projektohet  e ardhmja europiane e shoqërisë. Në çeljen e ekspozitës  morën pjesë piktorë, artistë, anëtarë të stafit akademik, intelektualë dhe studentë të Universitetit Europian të Tiranës.