Nishani, takime me Dukën e Madh të Luksemburgut dhe Kryeministrin e Kuvajtit
Në vijim të qëndrimit në New York, si pjesëmarrës në Debatin e Përgjithshëm të Sesionit të 67-të të Asamblesë së Përgjithshme të OKB-së, Presidenti i Republikës, Bujar Nishani zhvilloi një takim me Dukën e Madh Henry të Luksemburgut, ku ishte i pranishëm edhe Ministri i Punëve të Jashtme, Edmond Panariti.
Presidenti Nishani bëri një ekspoze të arritjeve të Shqipërisë në rrugën e reformave, bazuar në 12 prioritetet kyçe të Komisionit Evropian, ku përmendi ligjet e miratuara me shumicë të cilësuar votash, Kodin e ri Elektoral të miratuar me konsensus të gjerë politik, reformat në sistemin e drejtësisë, duke shprehur bindjen se populli shqiptar dhe institucionet shtetërore presin që marrja e statusit të vendit kandidat në Bashkimin Evropian të jetë një proces i merituar nga Shqipëria.
Nga ana e tij, Duka i Madh Henry i Luksemburgut vlerësoi reformat e rëndësishme të ndërmarra në Shqipëri duke theksuar se vendet partnere të BE-së presin nga institucionet shqiptare hapa të mëtejshëm për plotësimin e të gjitha kritereve të kërkuara për marrjen e statusit të vendit kandidat.
Duka i Madh i Luksemburgut vlerësoi se konsensusi mes forcave politike në Shqipëri duhet të vijojë me qëllim që të arrihen standardet për integrimin e Shqipërisë në Bashkimin Evropian.
Duke nënvizuar rolin e Shqipërisë në rajon, Presidenti i Republikës vlerësoi mbështetjen e Luksemburgut për njohjen e Pavarësisë së Kosovës.
Kreu i Shtetit falenderoi Dukën e Madh Henry për ndihmën dhe mbështetjen e vazhdueshme që Luksemburgu i ka dhënë Shqipërisë në 22 vitet e fundit, veçanërisht sa i përket anëtarësimit në NATO, liberalizimit të vizave dhe procesin e integrimit në Bashkimin Evropian.
Një tjetër takim, Presidenti Nishani e pati edhe me Kryeministrin e Kuvajtit,Sheikun Jaber Al Mubarak Al Hamad Al Sabah.Presidenti i Republikës shprehu mirënjohje dhe e falenderoi Kryeministrin kuvajtian për njohjen nga shteti i tij të Pavarësisë së Kosovës, duke e cilësuar këtë si kontribut të njëmendtë për paqen dhe stabilitetin në rajonin e Ballkanit.
Kryetari i Shtetit shprehu dëshirën që Kuvajti të shfrytëzojë lidhjet dhe influencën e tij për të ndikuar në shtimin e njohjeve të shtetit të ri të Kosovës.
Presidenti Nishani i shprehu mirënjohjen Kryeministrit të Kuvajtit, Sheikut Jaber Al Mubarak Al Hamad Al Sabah për donacionet personale të Emirit të Kuvajtit dhe të gjitha investimet në projektet madhore të Shqipërisë.