Një ditë para zgjedhjeve, fluks qytetarësh për t'u pajisur me karta

Për të gjithë qytetarët që nuk kanë pasaporta, ka mbetur vetëm edhe një ditë kohë për t'i tërhequr kartat e identitetit dhe për të votuar në zgjedhjet elektorale. Në të gjitha njësitë bashkiake të kryeqytetit është rritur ndjeshëm fluksi i qytetarëvë për t'i tërhequr kartat e identitetit. Punonjësit e minibashkive janë shprehur se ende vazhdon të ketë një numër të kartave të patërhequra, por sipas tyre ky numër është i vogel. Megjithatë, përfaqësuesit e njësive vendore bëjnë apel tek të gjithë banorët e Tiranës që të paraqiten sa më shpejt në zyrat përkatëse dhe t'i tërheqin letërnjoftimet e tyre të prodhuara tashmë. Punonjëset gjithashtu janë shprehur në mënyrë konfidenciale, se edhe ata qytetarë që kanë aplikuar në datën 18 qershor, pra në ditën e fundit që u sigurohej prodhimi i kartës , do të mund të pajisen me letërnjofim sepse një numër i madh i këtyre kartave janë prodhuar dhe gjenden në zyrat e minibashkive. Njësitë bashkiake njoftojnë gjithashtu se edhe të dielen , pra pikërisht
në ditën e zgjedhjeve , zyrat pëkatëse të gjendjeve civile do të qendrojnë hapur deri në orën 19:00 në mënyrë që t'u ofrohet të gjithëve tërheqja e këtyre mjeteve të identifikimit dhe mundësia për të votuar .