Norvegjia forcon kufirin me Rusinë: Gardhe, dronë dhe mbikëqyrje ajrore për siguri më të lartë

Norvegjia ka njoftuar një paketë të gjerë masash për përmirësimin e sigurisë përgjatë kufirit të saj 198 kilometra të gjatë me Rusinë.

Plani përfshin ndërtimin e gardheve të reja, instalimin e sistemeve moderne të mbikëqyrjes dhe përdorimin e dronëve për monitorim ajror.

Sipas Drejtorisë së Policisë Norvegjeze, gardhet do të vendosen në pikat strategjike brenda Rrethit Arktik, përfshirë Skæverhulet — ish-pikë kufitare në Sør-Varanger — si dhe Storskog, pika e vetme zyrtare e kontrollit kufitar mes Norvegjisë dhe Rusisë.

Autoritetet konfirmuan se do të instalohen edhe sensorë të avancuar dhe kamera mbikëqyrjeje për të ndjekur aktivitetet përgjatë kufirit.

Shefja e Policisë së Qarkut Finnmark, Helen Katrin Hetta, tha se dronët do të përdoren në zona të caktuara për të përmirësuar mbikëqyrjen nga ajri.

Oslo ka siguruar financim prej rreth 16.4 milionë eurosh nga Komisioni Evropian, që do të përdoret deri në fund të vitit 2024. Vetëm gardhi i ri në Skæverhulet pritet të kushtojë rreth 400,000 euro.

Nënkoloneli Rune Rippon nga Shtabi i Mbrojtjes Norvegjeze theksoi se ushtria dhe policia do të intensifikojnë bashkëpunimin si pjesë e kësaj iniciative. “Situata e sigurisë në Evropë ka detyruar Norvegjinë të marrë masa të reja për forcimin e kontrolleve kufitare,” tha ai, duke e cilësuar gjendjen si një “kërcënim në rritje”.

Edhe pse Norvegjia nuk është anëtare e Bashkimit Evropian, ajo është pjesë e Marrëveshjes së Shengenit dhe Zonës Ekonomike Evropiane, çka i mundëson bashkëpunim të ngushtë me strukturat kufitare dhe të sigurisë të BE-së.

Sipas gazetës Barents Observer, Norvegjia ka nisur ndërtimin e një gardhi më të lartë dhe më të sigurt në Storskog që në fillim të vitit, si përgjigje ndaj tensioneve në rritje me Rusinë. Në gusht, vendi formoi zyrtarisht një brigadë të dytë ushtarake në rajonin Arktik, për të rritur mbikëqyrjen dhe sigurinë në kufi.

Kryeministri norvegjez Jonas Gahr ka deklaruar se Rusia ka shkelur hapësirën ajrore të Norvegjisë tri herë gjatë këtij viti, duke shtuar shqetësimet për sigurinë kombëtare.

/rtsh.al/