Olldashi: PD duhet të zgjerojë Kryesinë, edhe kryetarët në rrethe

Kandidati për kreun e Partisë Demokratike Sokol Olldashi, kërkoi që kryetarët e degëve në rrethe të jenë pjesë e Kryesisë së Partisë Demokratike të Shqipërisë. Kjo strukturë e vendimmarrjes, tha Olldashi duhet të zgjerohet për të kthyer përfaqësimin politik tek baza e partisë.
Platforma
Kjo do të thotë që ne kemi nevojë të zgjerojmë kryesinë e përgjithshme të Partisë Demokratike të Shqipërisë. Të kemi 36 kryetarë të degëve qendër rrethi- ex officio anëtarë të Kryesisë dhe shtuar këtyre një korpus anëtarësh, të cilët do të bëjnë kryesinë në tërësi. Nga ana tjetër kemi nevojë të ndërtojmë një korpus këshillimor apo një hallkë të ndërmjetme, jo vendimmarrëse, por këshilluese për kryetarin dhe për Kryesinë. Pra një grup, i cili ka të gjithë eksperiencën e ndërtuar nga PD në 23 vjet dhe që e vë në funksion të drejtimit politik të partisë, u shpreh Olldashi. Këto deklarata, Olldashi i bëri në Tiranë gjatë takimit me strukturat e grup-seksionit të Partisë Demokratike në Kombinat.
Anëtari i thjeshtë
Ai tha se ndër të tjera është e nevojshme të bëhet inventarizimi i kontributeve të çdo anëtari si dhe të vendosen mekanizma përgjegjësish dhe mekanizma stimujsh. Sipas tij, kjo do të bëjë që e gjithë struktura të jetë në sinkron, dhe i gjithë ingranazhi nga anëtari i thjeshtë deri te kryetari i Partisë Demokratike të jenë në lëvizje të njëkohshme.