Opozita duhet te ndertoje nje aleance sa me te madhe politike

Ndryshe nga kryetari i Partisë Socialiste Edi Rama, i cili shprehet se Partia Socialiste mund të fitojë e vetme në zgjedhje, koordinatori i “Opozitës së Bashkuar” Preç Zogaj, thekson se aleanca opozitare duhet të zgjerohet akoma më shumë. Sipas tij, sistemi zgjedhor është më së shumti një sistem i koalicioneve të mëdha dhe jo i partive të mëdha.
Referuar largimit të Partisë Demokristiane nga radhët e koalicionit opozitar, Zogaj mendon se ishte një lëvizje e gabuar e kësaj force politike. Për të, pretendimet e demokristianëve se Partia Socialiste nuk mbrojti kërkesat e partive të vogla për korrektim kombëtar të sistemit zgjedhor, ishin të pabaza.
Për koordinatorin e “Opozitës së Bashkuar”, koalicioni opozitar duhet që mbi të gjitha të prezantohet në fushatë me një program të detajuar politik, dhe mbi këtë program ajo të identifikohet.