Opozita në Siri me grevë kundër dhunës

Me një protestë të përgjithshme, opozita siriane është përpjekur që të rrisë trysninë ndaj udhëheqjes në Damask.

Sipas të dhënave të aktivistëve për të drejtat e njeriut, gjatë fundjavës u zhvilluan protesta në shumë provinca.

Në provincën Dara dhe Idleb, si dhe në qytetet Homs dhe Harasta, u mbyllën një pjesë e madhe e dyqaneve. Forcat e sigurimit ishin përpjekur që t'i detyronin me dhunë tregtarët të hapnin dyqanet e tyre, bën të ditur qendra e vëzhguesve sirianë për të drejtat e njeriut në Londër. Edhe në kryeqytet, në lagjen ku sundon opozita dhe në disa fakultete të Universitetit u bë thirrje për mbylljen e dyqaneve në shenjë proteste.

Kryetari i këshillit kombëtar opozitar të Sirisë, Burhan Ghaliun, tha për revistën gjermane "Der Spiegel", se opozita nuk është më e gatshme për të negociuar me vrasjet që kanë ndodhur në Damask.

Në të njëjtën kohë ai theksoi se ajo është e gatshme të bisedojë me zyrtarë ushtarakë dhe civilë për të ardhmen e vendit.

Në ndërkohë raportohet se ushtarët sirianë i kanë luftuar kryengritësit, në një prej betejave më të mëdha në nëntë muajt e fundit në Siri.

Më shumë nga Ndërkombëtare