Organizata Trump shpallet fajtore për skemën e shmangies nga taksat
Kompania e Donald Trump u dënua sot për mashtrim tatimor, pas një çështje të ngritur nga Prokurori i Qarkut Manhattan, lidhur me praktikat financiare në biznesin e ish-presidentit.
Juria shpalli fajtor dy entitete korporative në Organizatën Trump, për 17 akuzat e ngritura, duke përfshirë edhe akuzat për konspiracion dhe falsifikim të të dhënave të biznesit.
Vendimi erdhi në ditën e dytë të diskutimeve, pas një gjyqi në të cilin Organizata Trump u akuzua si bashkëpunëtore në një skemë për të shmangur pagimin e taksave mbi të ardhurat personale për përfitimet në punë si apartamente pa qira dhe makina luksoze.
Dënimi vërtetoi akuzat e prokurorëvë të Nju Jorkut, të cilët shpenzuar tre vjet duke hetuar ish-presidentin dhe bizneset e tij. Gjithësesi, dënimet nuk pritet të jenë aq të rënda sa të rrezikojnë të ardhmen e kompanisë së Trump.
Si ndëshkim, Organizata Trump mund të gjobitet deri në 1.6 milion dollarë, një shumë relativisht e vogël për një kompani të madhe siç është ajo.
Trump, i cili kohët e fundit njoftoi se do të kandidonte sërish për president, ka thënë se çështja kundër kompanisë së tij ishte pjesë e një “gjuetie shtrigash”, e motivuar politikisht nga demokratët.
Vetë Trump nuk ishte në gjyq, por prokurorët pretenduan se ai “e dinte saktësisht se çfarë po ndodhte” me skemën, ndonëse ai dhe avokatët e kompanisë e kanë mohuar këtë.
Çështja kundër kompanisë u ndërtua kryesisht rreth dëshmisë së ish-shefit të financës së Organizatës Trump, Allen Weisselberg, i cili më parë u deklarua fajtor për akuzat se manipulonte librat e kompanisë dhe paketën e tij të kompensimit, për të ulur në mënyrë të paligjshme taksat e tij.
Weisselberg dëshmoi në këmbim të një dënimi me 5 muaj burg. Apnews
/rtsh.al/