PBKD, Roshi: PS-ja, politikë guerilase

Partia e Ballit Kombëtar Demokrat konsideron se veprimtaria e Partisë Socialiste është vazhdim i politikës guerile të paraardhësve të tyre. Sipas kryetarit Artur Roshi, me bllokimin e shesheve dhe rrugëve ata shqetësojnë qytetarët dhe me këtë duan të tërheqin vëmendjen e publikut që është indiferent ndaj politikës së tyre për pushtet. Greva e urisë nuk është element demokratik, sepse ajo nuk mundëson hapësira për kompromis. Vetësakrifica është ushtrim i dhunës pasive, e cila përdoret për shantazh, - deklaroi z. Roshi. PBKD-ja më tej vlerëson se Shqipëria ka nevojë më shumë se kurrë për reformën e dekomunistizimit: ligji i lustracionit, hetimi i krimeve të komunizmit dhe rishkrimi i historisë, të cilat do të na ndihmojmë që të mos përsëriten gabimet e të shkuarës që shpesh kanë qenë fatale. Kreu i PBKD-së, Artur Roshi, bëri dje të ditur: Ne mendojmë se origjina e tensioneve të sotme politike i ka rrënjët te mendësia komuniste që kanë segmente të caktuara të spektrit të sotëm politik. Komunizmi është një ideologji e bazuar jo te politika të arsyeshme, por te instinkti për pushtet, për të cilin ata janë të gatshëm të sakrifikojnë gjithçka, përfshi edhe jetë njerëzore të pafajshme.