PD: Mediat mashtruan për Gërdecin

PD-ja është përpjekur dje që të mbulojë të vërtetën e shkrimit të botuar në "New York Times" mbi ngjarjen e Gërdecit, duke akuzuar disa nga mediat e shkruara si antiqeveritare. Selia blu e ka cilësuar shkrimin e "New York Times" si një krijim të përbashkët të katër mediave të shkruara, kur në të vërtetë ai ka qenë vetëm një pasqyrim i asaj çka është botuar në të përditshmen prestigjioze. Në një deklaratë për shtyp të PD-së citohet se "disa gazeta hapin faqen e parë me të njëjtin titull të shpikur: Gërdeci, ilustrim i tmerrshëm i korrupsionit të Qeverisë, i cili nuk ekziston në asnjë rresht në gazetën ‘New York Times‘". Sipas kësaj deklarate "spekulimi, falsifikimi ndaj ‘New York Times‘ dhe shpifja me tituj që nuk ekzistojnë është çështje e tyre, dhe jam këtu vetëm për të përgëzuar novitetin e këtyre gazetave". PD-ja e cilëson si novitet të vërtetën që pasqyrohet në faqet e gazetës më prestigjioze të botës, e cila është botuar edhe në disa të përditshme shqiptare. "Për ne nuk ka rëndësi një shpifje më shumë apo më pak e tyrja, por rëndësi dhe vlerë paraqet, mendoj, redaksia e përbashkët që kanë krijuar këto gazeta, për të shkurtuar shpenzimet e tyre", thuhet në komunikatën për shtyp të PD-së. Në këtë mënyrë, selia e partisë më të madhe, në vend që të merret me përçarjen që ka kapluar strukturën e PD-së për mënyrën e zgjedhjes së Presidentit të ardhshëm, apo për zbardhjen e plotë të ngjarjes së Gërdecit, por merret me sulme ndaj medias, për artikuj që në të vërtetë janë botuar më parë në gazetën më prestigjioze në botë, "New York Times".