PD lë pushtetin, kreu i ILDKP-së fillon spastrimet për të hapur vende pune
Nga Lindita Çela
Sapo Partia Demokratike humbi zgjedhjet, drejtuesit e institucioneve të pavarura, por që janë emëruar prej PD, kanë nisur fushatën e spastrimit të administratës për të hapur vende të reja pune.
Kështu ka vepruar edhe Zana Xhuka, ish-zv.ministre e Mbrojtjes, e zgjedhur në krye të Inspektoratit të Lartë të Deklarimit dhe Kontrollit të Pasurive nga Partia Demokratike.
Xhuka ka urdhëruar uljen e më pas shkarkimin nga detyra, të katër drejtuesve kryesor të administratës së institucionit që drejton prej janarit të këtij viti.
Bëhet fjalë për Sekretarin e Përgjithshëm të ILDKP-së, Drejtoreshën Juridike, Drejtoreshën e Financës dhe atë të Burimeve Njerëzore.
Vendimi nga kreu i ILDKP-së është marrë një javë me parë, pikërisht në kohën kur u zyrtarizua humbja e zgjedhjeve të Partisë Demokratike.
Por zonja Xhuka nuk është mjaftuar me kaq. Për të zbatuar vendimin e saj, ajo ka urdhëruar dhe thyerjen e zyrave të katër drejtuesve të lartë e administratës.
Ngjarja thuajse ka shkaktuar një kaos në këtë institucion, ku gjithkush është, së paku pataksur, nga shkelja flagrante që Xhuka i ka bërë ligjit, duke dhunuar jo vetëm institucionin, por dhe të drejtat e këtyre drejtuesve.
Kreu i ILDKP-së ka avancuar me urdhrat e saj, pasi punonjësit nuk kanë pranuar të zbatojnë vendimin e Xhukës për uljen e tyre në detyrë, pasi e konsiderojnë atë si të paligjshëm, dhe arbitrar.
Për këtë arsye drejtuesit e lartë të ILDKP-së i janë drejtuar Komisionit të Shërbimit Civil, pasi gëzojnë statusin e nëpunësit civil.
Por megjithëse kjo çështja ende nuk është shqyrtuar, Xhuka ka urdhëruar thyerjen e zyrave të drejtuesve të lartë duke marrë në dorëzim të gjithë dokumentacionin e paprotokolluar.
Burime të besueshme bëjnë të ditur për TemA se drejtuesit e lartë kanë vite që punojnë në këtë institucion dhe njihen si persona të përkushtuar që, deri më tani, nuk kanë kryer asnjë veprimtari që bie ndesh me ligjin.
Ndryshmet e bujshme si dhe sjelljen arrogante të kreut të ILDKP-së, punonjës së këtij institucioni e komentojnë vetëm me faktin e hapjen së vendeve të reja të punës, pasi Xhuka njihet si person që militon dhe ka bërë karrierë vetëm tek Partia Demokratike.